Кина го фиксира девизниот курс посилно од очекуваното десетти ден по ред и најави дека ќе им овозможи на банките да чуваат помалку странски валути во резерви, што е најзначајниот потег досега за стабилизирање на слабеењето на јуанот.
Народната банка на Кина денеска ја одреди референтната стапка на јуанот на 6,9096 за долар. Тоа се случи еден ден откако централната банка соопшти дека од 15 септември од финансиските институции ќе се бара да чуваат само шест отсто од нивните девизи во резерва, со што практично ќе се зголеми понудата на долари и други валути на копното. Намалувањето од два процентни поени е најголемо од 2004 година.
Иако потезите треба да го ограничат падот на јуанот во однос на доларот, тие малку укажуваат на тоа дека централната банка се обидува да ги намали загубите. Владата можеби сака да го забави темпото на депресијација, но не „повлекува линија во песокот за да задржи некое одредено ниво засега“, вели Кун Гох, шеф на одделението за истражувања на Азија во банкарската групација Австралија и Нов Зеланд.
Прашањето е дали ќе има порешителна акција од страна на властите доколку јуанот почне да се приближува до психолошкото ниво од седум за долар, додаде тој.
Обложувањето против јуанот беше успешна стратегија во изминатиот месец. Јуанот падна за 2,5 отсто бидејќи кинеската стратегија на „нулта ковид“ ѝ наштети на и онака кревката економија, а агресивното зголемување на каматните стапки од страна на САД, го забрзува одливот на капитал. Депресијацијата доаѓа во чувствителен момент за Пекинг, кој за следниот месец подготвува реконструкција во партијата, што се случува двапати во десет години. Затоа одржувањето на стабилен девизен пазар е најважно за владата, бидејќи неуредниот пад на курсот на јуанот може да се прелее на акциите и да ја загрози финансиската стабилност.
PBOC (Народната банка на Кина) ги засили напорите да го запре поевтинувањето на јуанот во изминатите две недели. Не се очекуваше Кина да ја зајакне својата валута 10-та последователна сесија, што е најдолго од 2019 година. Намалувањето на девизните депозити во понеделникот беше повеќе од двојно од намалувањето во април. Исто така во понеделникот, заменик-гувернерот на PBOC, Лиу Гуочианг, им изјави на новинарите во Пекинг дека Кина успеала да го одржи јуанот стабилен, додавајќи дека на краток рок ќе биде „норма“ кинеската валута да се движи на два начина.
Без паника
Денешното фиксирање означува дека првпат во последните две години јуанот го надмина клучното ниво од 6,90, последната голема бариера пред валутата да ја надмине пресвртницата од седум. Кога PBOC дозволи референтната стапка да се искачи над неа во 2019 година, офшор јуанот падна за 1,8 отсто за еден ден.
Тој потег на централната банка предизвика неколку бранувања, при што јуанот падна за помалку од 0,1 отсто во однос на доларот и на копно и офшор. На основа на пондерирана трговија, репликата на Bloomberg на CFETS RMB индексот во реално време падна за 0,2 отсто.
Аналитичарите велат дека очекуваат PBOC да преземе повеќе мерки доколку повторно се забрза депресијацијата на јуанот, особено ако тоа предизвика менталитет на стадо кај трговците. Nomura Holdings Inc. очекува централната банка да го намали коефициентот на девизните резерви за уште 100 базични поени до крајот на оваа година, додека United Overseas Bank Ltd. посочи дека PBOC, исто така, може да го зголеми издавањето на офшор сметки за да ја апсорбира ликвидноста.
Иако слабите фундаментални фактори може да тежат на јуанот некое време, пазарот треба да забележи дека PBOC „има доволно муниција“ да управува со валутата, смета Минг Минг, главен економист во Citic Securities Co.
.webp){kind=icon}
