.webp){kind=icon}
Европските фјучерси за природен гас паднаа на најниско ниво во речиси два месецa, бидејќи земјите ги зајакнаа мерките за борба против енергетската криза во пресрет на грејната сезона која започнува за помалку од две недели.
Референтните цени денеска паднаа за 8,8 отсто, продолжувајќи го падот од минатата недела. Германија, Велика Британија и други земји планираат да потрошат милијарди евра за да ја намалат зависноста од рускиот увоз, да ги спасат локалните енергетски компании и да ги намалат цените, намалувајќи го притисокот врз домаќинствата и бизнисите.
„Ситуацијата на европскиот енергетски пазар е подобрена во последните три недели поради усвоените мерки“, изјавија во понеделникот аналитичарите од компанијата за анализа на пазарот на гас Timera Energy.
Продолжуваат дискусиите за предлозите на Европската унија за намалување на последиците од кризата. Предлозите вклучуваат собирање на 140 милијарди евра (140 милијарди долари) преку поголеми даноци за енергетските компании, како и задолжителни ограничувања за користење на електрична енергија и зголемена ликвидност.
Високите испораки на течен природен гас придонесуваат за „мечкин“ сентимент, заедно со новиот терминал за ЛНГ на пристаништето Емсхавен, кој ѝ помага на Европа со увозот.
Одлуката на Германија од петокот да ја преземе контролата врз подружницата на руската нафтена компанија „Роснефт“ (Rosneft PJSC) претставува прв чекор што може да му овозможи на Берлин да преземе голем дел од енергетскиот сектор на најголемата европска економија. Владата преговара и за национализација на најголемите германски увозници, „Унипер“ (Uniper SE) и ВНГ (VNG AG), според извори запознаени со ситуацијата.
Британската влада подготвува план за преполовување на цените на енергијата за многу бизниси како дел од спасувачкиот пакет на британската премиерка Лиз Трас од 40 милијарди фунти (40 милијарди долари). Франција планира да го ограничи порастот на цените на енергијата за домаќинствата почнувајќи од следната година, потег што ќе ја чини владата 16 милијарди евра во нето износ во 2023 година, според францускиот министер за финансии, Бруно Ле Мер.
Како што се приближува грејната сезона, останува да се види дали мерките ќе имаат соодветен ефект, а трговците ќе продолжат да го следат нивото на залихите. Складиштата во Европа се пополнети околу 86 отсто, што е малку над петгодишниот просек, со 90 отсто пополнетост во Германија, покажуваат податоците на здружението Gas Infrastructure Europe (GIE).
И покрај неодамнешното слабеење на цените на гасот, тие сè уште се над седум пати поголеми од просекот за овој период од годината, што предизвикува забрзување на инфлацијата и приближување на економиите кон рецесија. Постепен пад на побарувачката се очекува од први октомври и почетокот на грејната сезона.
„Европскиот пазар на гас останува на работ од сечилото како што наближува зимата“, велат аналитичарите на Timera Energy.
Временските прогнози предвидуваат голем пад на температурите до крајот на месецот. На холандската платформа за тргување со гас TTF, која е референца за европскиот пазар, до 9 часот и 30 минути утрово се договараше гас по цена од 174 евра/MWh, што е најниско ниво од 25 јули врз основа на дневните податоци. Пазарот во Велика Британија е затворен поради неработниот ден за погребот на кралицата.
Паѓаат и цените на енергијата. Германските фјучерси за следната година паднаа за осум отсто на 470 евра/MWh.
