Фјучерсите за европскиот природен гас пораснаа бидејќи трговците ги преиспитуваат ризиците за снабдување поради знаците на глобалната конкуренција за гориво и топлотниот бран што го погоди регионот.
Референтната вредност на природниот гас ја заврши неделата со 35 проценти повисока цена, што е најмногу од август минатата година, кога беше екот на енергетската криза во Европа. Тоа, исто така, претставува прв неделен раст од март.
Денешниот раст е најновиот пример на екстремна нестабилност оваа недела, откако се чинеше дека договорите се најдоа на долна ценовна граница од околу 23 евра. Со оглед на тоа што високите залихи и намалената индустриска побарувачка ги намалија цените во последниве месеци, трговците сега размислуваат за можноста за намалување на залихите.
Во Норвешка, која е најголемиот снабдувач со природен гас во Европа, и натаму има прекин на дел од испораките. Покрај тоа, постои загриженост дека силниот доток на течен природен гас, што му помогна на континентот да закрепне од кризата, може да се намали во текот на следните месеци поради долгиот период на ниски цени.
Загриженоста за снабдувањето се совпаѓа со повисоките температури бидејќи летото веќе го зема замавот, што може да ги зголеми потребите за ладење и во Европа и во Азија и да ја зајакне конкуренцијата за течен природен гас. А, потоплото време овој викенд ќе се прошири низ многу делови од Европа.
Американските испораки на гориво, кои се клучни за енергетската безбедност на Европа, во моментов се попрофитабилни во Азија за испораките во јули, август и септември, проценува „Блумберг НЕФ“ (BloombergNEF).
Топлотниот бран во североисточна Азија, што се очекува во текот на следните неколку недели, исто така, ќе ја зголеми побарувачката за ладење.
Движење на цената на холандскиот природен гас / Bloomberg Mercury
Референтната цена на холандскиот природен гас денеска порасна за 19 проценти, на 32,05 евра за мегават-час, додека еквивалентниот договор во Обединетото Кралство порасна за 23 отсто. Според Том Марзек-Мансер, раководител за анализа на гас во ИЦИС (ICIS) во Лондон, ажурирањата на норвешкото одржување веројатно исто така придонесуваат за растот на цените.
Сепак, останува ценовната неизвесност бидејќи индустриската побарувачка за гас во најголемите европски економии не покажа знаци на значајно закрепнување, дури и ги намали цените за околу 90 проценти во однос на нивните максимални вредности достигнати во 2022 година. Според „S&P Global Commodity Insights“, забавувањето на економијата и свртувањето кон обновливите извори на енергија во мај ја намали побарувачката на гас во Германија, Италија, Холандија, Франција, Шпанија и Велика Британија за речиси 10 проценти во однос на истиот месец претходната година.
.webp){kind=icon}
