Цената на нафтата се спушта кон најниското ниво од јануари

Нафтата се повлече бидејќи доларот дополнително зајакна, а бројките кои укажуваат на зголемени залихи во Соединетите Американски Држави (САД) се спротивставуваат на претпоставките дека Организацијата на земјите извознички на нафта и нивните сојузници (ОПЕК+) ќе ја намали испораката.

„West Texas Intermediate (WTI)“ потона под 78 долари за барел, спуштајќи се кон најниското ниво од почетокот на јануари. Американската валута напредуваше до нов рекорд откако високиот службеник од администрацијата на американскиот претседател Бајден ја отфрли идејата дека би можело да постои координирано глобално настојување да се заузда растот на доларот.

Bloomberg/„WTI“ губи од вредноста поради тоа што јакне доларот

Утрово „WTI“ со испорака во ноември падна за 1,4 проценти и барел нафта се продава за 77,43 долари. За ист процент падна и вредноста на „Brent“ суровата нафта за ноември, со тоа што таа сега се продава по цена од 85,10 долари за барел. Декемвриските договори, пак, загубија 1,3 отсто од вредноста и сега се продаваат за 83,79 долари за барел.

Референтната вредност на суровата нафта во САД и натаму се движи во насока за да го оствари својот прв тримесечен пад во повеќе од две години поради загриженоста дека забавувањето на глобалната економија ќе влијае на потрошувачката на енергија бидејќи централните банки ги зголемуваат трошоците за задолжување за да ја скротат инфлацијата.

Растот на американската валута, кој што е поттикнат од најагресивното зголемување на каматните стапки од страна на Федералните резерви (ФЕД) од 1980-тите години, ги прави производите и суровините, чија вредност е изразена во долари, скапи за поголемиот дел од купувачите од странство. Во план се и натамошни зголемувања на каматните стапки од страна на креаторите на монетарната политика на ФЕД, кои не отстапуваат од својата намера да го скротат растот на цените.

Падот на цената на нафтата потекнува од прогнозите дека земјите од ОПЕК+ групата ќе го намалат производството за да го прекинат падот на цената. Суровата нафта вчера порасна за 2,3 отсто откако Ројтерс извести дека Москва сака на состанокот на 5 октомври групацијата да го намали производството за околу милион барели дневно. Мнозинството банки, вклучувајќи ја и „UBS Group AG“, исто така, тврдат дека сојузот може да го намали производството.

Трговците го следат и напредокот на ураганот Иан, за кој што се очекува дека ќе дојде до западниот брег на Флорида доцна во текот на денов. Претходно, американските енергетски компании го намалија дневното производство на нафта за околу 190.000 барели, што според владините податоци претставува 11 проценти од американското производство во Мексиканскиот залив.

Во моментов нема коментари за веста. Биди прв да коментира...

Остави коментар