Нафтата без поголеми промени по иранскиот напад врз Израел

Нафтата реагираше малку негативно по нападот на Иран врз Израел, а цените паднаа поради шпекулациите дека конфликтот ќе остане под контрола.

Брент првично поскапе за 0,7 отсто, на 91,05 долар за барел, пред да падне на 90 долари. Повеќе од 300 проектили и беспилотни летала беа истрелани од Иран во текот на викендот, кој првпат отворено го нападна Израел од своја територија, иако повеќето напади беа пресретнати. Акцијата, која се очекуваше со денови, дојде како одмазда за нападот во Сирија во кој загинаа ирански воени офицери.

„Оваа војна може да се смири доколку израелската влада го послуша советот на Белата куќа и се воздржи од одмазда“, велат аналитичарите на РБЦ (RBC Capital Markets LLC), вклучувајќи ја и Хелима Крофт. Иако акцијата на Иран беше „многу пообемна од претходните репресалии, сепак беше најавена однапред“, велат тие.

Нафтата беше еден од производите со најдобри перформанси годинава, бидејќи ОПЕК+ цврсто го контролира обемот на понудата за да ги намали резервите и да ги поддржи цените. Последниот напад ги ескалира тензиите во регионот, кој произведува околу една третина од светската сурова нафта, и е најнов пресврт во пресметката што следуваше по нападот на Хамас (поддржан од Техеран) врз Израел во октомври минатата година. Сепак, мисијата на Иран во Обединетите нации соопшти дека прашањето „може да се смета за затворено“, со што засега се намалува ризикот од поширок конфликт.

Цената на суровата нафта малку се промени по нападот од Иран

Bloomberg Mercury

„Ситуацијата е кревка, но ако Израел покаже дека нема да возврати, тензиите на пазарот ќе се намалат“, рече Арне Ломан Расмусен, раководител на истражување во АС (A/S Global Risk Management).

Поморските ризици беа исто така во фокусот, откако Иран го зазеде „Ариес“ (MSC Aries) во близината на клучниот теснец Ормуз, непосредно пред нападот врз Израел. Правниот сопственик на бродот е дел од групацијата „Зодијак“ поврзана со Израел, според податоците собрани од „Блумберг“. Овој потег предизвикува загриженост за безбедноста на бродовите во регионот, додавајќи притисок на претходните логистички нарушувања.

„Најзагрижувачкото сценарио е затворањето на Ормускиот Теснец“, рече Расмусен од АС. „Не мислам дека Иран ќе го затвори теснецот, но ризиците растат“.

Додека движењата на цените беа придушени, тргувањето беше брзо, со речиси 100.000 лота брент купени до пладне во Сингапур. Тоа е околу десет пати повеќе од обемот што вообичаено се тргува до тоа време во типична сесија. Исто така имаше над 5.000 лота во опции од 95 долари за брент што забележаа поместувања. Оптимистичките опции за купување се во предност над песимистичките облози од тој тип.

Цени:

- Брентот за јунско порамнување поевтини за 0,2 отсто, на 90,23 долари за барел, во 12.33 часот во Сингапур;

- ВТИ за испорака во мај падна за 0,3 отсто, на 85,37 долари за барел.

Во моментов нема коментари за веста. Биди прв да коментира...

Остави коментар