text size
Цената на нафтата на светските пазари паѓа веќе трети ден по ред бидејќи инвеститорите се загрижени околу глобалното економско забавување. Дури и американскиот претседател Џо Бајден рече дека е можна рецесија.
„West Texas Intermediate“ (WTI) падна под 89 долари за барел откако загуби повеќе од три отсто од вредноста во текот на претходните два дена. Поточно, утрово се тргува по цена од 88,63 долари за барел. „Brent“ суровата нафта загуби 0,6 отсто од вредноста и падна на 93,71 долари за барел.
Нафтата минатиот месец го достигна најниското ниво од јануари, а потоа почна да заздравува откако Организацијата на земји извознички на нафта и нивните сојузници (ОПЕК+) донесоа заедничка одлука да го намалат снабдувањето со нафта, со цел да интервенираат и да го спречат падот на цената на енергенсот. Но, сега тие добивки се губат поради најавите за ново зголемување на каматните стапки од страна на американските Федерални резерви (ФЕД), бидејќи со таквиот потег се забавува економскиот раст и се зголемува вредноста на доларот. Според тоа, константните напори во Кина да се заузда Ковид-19 ја загрозуваат побарувачката во таа земја, која што всушност е најголем светски увозник на нафта.
Зајакнатиот американски долар придонесува за падот на нафтата, а показателот на Блумберг за зелената валута веќе шести ден по ред се движи во нагорна линија. Тоа ги прави производите, кои што се тргуваат во долари, поскапи за странските купувачи.
Инвеститорите се во исчекување и на податоците и очекувањата за пазарот на нафта, што во текот на следните денови треба да ги објават ОПЕК, Меѓународната агенција за енергија и Американската управа за енергетски информации. Извештаите треба да ги покажат и очекувањата за трендовите на побарувачката до 2023 година.
„Позадината на загриженоста од рецесија и намалување на побарувалката за нафта обично го отежнува пазарот на нафта да одржи каков било значаен раст на цените“, напоменуваат од „Standard Chartered Plc“.
.webp){kind=icon}
