Руската инвазија на Украина донесе многу економски нарушувања, а она што сега станува сè повидливо е можниот недостиг на тоалетна хартија.
Руската забрана за извоз на дрво од бреза, кое содржи кратки влакна што ја прават тоалетната хартија помека, предизвика силна побарувачка за суровина за тоалетна и други видови хигиенска хартија, која сега станува сè потенка, а поскапа.
Ова не е прв пат во последно време тоалетната хартија да стане жртва на нарушувањата на пазарот. На почетокот на пандемијата, недостигот на овој хигиенски производ беше предизвикан од паничното купување на потрошувачите кои се плашеа дека ќе останат без тоалетна хартија за време на карантинот и заклучувањата.
Русија го забрани извозот на дрво од бреза во март како одговор на санкциите на САД и Европската унија. Како резултат на тоа, од пазарот исчезнаа 800 илјади до 1,2 милиони тони дрвна маса, чија цена скокна за околу 45 отсто бидејќи се зголеми и цената на енергијата за претворање на струготини од дрво во целулоидна смеса. Сега производителите треба да се натпреваруваат во потрагата по суровини на други места.
„Нема одмор во побарувачката за дрвна суровина“, вели Пола Хорн од Хелсиншкиот истражувачки институт PTT.
Шведска и Финска се најголемите европски производители на типот на дрвна маса што се користи за производство на тоалетна хартија. Околу 10 отсто од дрвото што се користи во Финска доаѓа од Русија.
За работите да бидат уште покомпликувани, неколку големи производители на хартија имаа прекин на производството оваа година. Во Финска, исклучувањето траеше повеќе од три месеци поради штрајк на работниците. Сушата во Шпанија ја принуди Ence Energia y Celulosa да го запре производството во јули, а бразилската Suzano овој квартал го запре производството на два месеца заради модернизирање на погоните.
Годинава се бележи најголем недостиг на суровини за хартија во последните неколку години / Bloomberg Mercury
Недостигот од дрвна суровина ќе се почувствува до втората половина на следната година, истакнува аналитичарот на Santander, Рафаел Барчелос, додавајќи дека цените треба постепено да се стабилизираат кога ќе почнат со производство погоните што се градат во Чиле и Уругвај.
Финскиот производител Stora Enso Oyj најави дека сега мора да користи дрво со подолги влакна, што ја прави хартијата поцврста, но и погруба и поскапа. Друг фински производител на санитарна хартија, Metsa Tissue, вели дека се можни дополнителни намалувања на производството, а шведскиот Essity AB објави дека ги зголемува цените.
.webp){kind=icon}
