Бакарот губи од вредноста откако знаците за опаѓање на побарувачката во Кина придонесоа за пад на економската активност во втората најголема економија во светот. Дополнително, заздравувањето на доларот ги поскапе суровините чија цена е изразена во таа валута.
На Лондонската берза утрово вредноста на бакарот падна за 0,8 отсто, на 7.493 долари за тон. Другите основни метали се со мешан резултат. Цинкот падна за 3,2 отсто, додека оловото го продолжи својот раст на вредноста од петокот, поради тоа што веста дека ќе биде додаден во индексот на „Блумберг“ ја зголеми побарувачката за таа суровина.
Повеќе од половина од бакарот во складиштата на Лондонската берза на метали, од кој најголемиот дел е од руско потекло, е веќе нарачан за испорака и, главно, е насочен кон кинеските купувачи, велат извори упатени во тргувањето.
Податоците што се објавени денеска покажуваат дека индексите за набавките во Кина, како за производите така и за услугите, се во пад поради нулта ковид-политиката и кризата на пазарот на недвижности, кои продолжуваат да вршат притисок врз најголемиот светски потрошувач на метал.
Падот на цената на бакарот дополнително е поттикнат и од тоа што на минатонеделниот партиски конгрес во Пекинг претседателот Си Џинпинг рече дека Владата не е подготвена да ја промени својата економска политика.
„Загриженоста за макроекономијата расте“, рече Ји Џанфеи, аналитичар во компанијата „Гутаи Јунан фјучерс“ (Guotai Junan Futures Co) во Шангај. Трговците, исто така, внимателно ги следат економските движења во странство, за да видат дали пазарот може да апсорбира дополнителна понуда, додава Џанфеи.
.webp){kind=icon}
