.webp){kind=icon}
Цената на европскиот природен гас паѓа трет ден по ред, бидејќи обилните резерви и враќањето на потоплите временски услови помагаат да се олесни енергетската криза во регионот.
Референтните фјучерси прво се намалија дури за 4,8 проценти, а потоа вратија дел од загубата. Побарувачката се очекува да омекне во следните неколку дена, бидејќи се прогнозира температурите да се вратат по студениот бран. Исто така, постојат очекувања за повеќе течен природен гас, бидејќи клучниот терминал за извоз во САД презема чекори за рестартирање.
Силните испораки на течен природен гас и здравите резерви, кои се многу над просекот благодарение на намалената потрошувачка и релативно топлата зима, значително ги намалија цените на гасот во последните неколку недели. Тоа ги наведува некои политичари и економисти да сугерираат дека најлошото од енергетската криза во Европа заврши.
„Можеме да си дозволиме да бидеме пооптимисти. Складирањето гас е зголемено, а цените на бензинот се намалени. Инфлацијата паѓа, а неизвесноста се намалува“, велат аналитичарите на „Дојче банк“ (Deutsche Bank AG).
Резерви на гас во складиштата / Bloomberg Mercury
Деловните изгледи за најголемата европска економија Германија се подобрија, бидејќи рецесијата од која многумина стравуваа изгледа сè помалку веројатно, според податоците од институтот за економски истражувања ИФО од Минхен.
„Најважниот ризик за германската економија беше сценариото за рационализација на гасот. Тој ризик сега е оттргнат“, изјави претседателот на ИФО, Клеменс Фуест, во денешниот разговор за ТВ Блумберг.
Холандскиот природен гас, кој претставува референтна вредност за Европа, се тргува за 1,1 отсто пониско, односно за 57,61 евра за мегават-час. Фјучерсите досега само месецов загубија околу 25 проценти. Еквивалентниот договор во Обединетото Кралство беше намален за 0,7 отсто.
Испораките преку гасоводот од Норвешка се зголемуваат по падот поради одржувањето, што исто така придонесува за надолно расположение, иако овој месец се планирани повеќе работи на капацитетите во земјата.
Сепак, трговците и натаму остануваат фокусирани на неизвесноста околу побарувачката во Кина. „Економското закрепнување на земјата може да го задржи тесниот пазар оваа година“, рече Мег О’Нил, главен извршен директор на „Вудсајд“ (Woodside Energy Group Ltd), најголемиот извозник во Австралија.
Додека ризиците остануваат, цените во Европа се очекува годинава да се движат во опсег од 50 до 100 евра, смета „Дојче банк“. Тоа е силен пад од минатогодишните ценовни нивоа, иако сè уште станува збор за цени повисоки од историскиот просек.
