Европскиот природен гас забележа најголем неделен пад на цената од септември, поттикнат од благите временски услови, кои се очекува да се задржат во поголемиот дел од регионот за време на празничната сезона.
Референтните фјучерси затворија за 9,8 проценти пониско, губејќи 28 отсто од вредноста на неделно ниво. Се прогнозира температурите да останат над просекот до почетокот на јануари во многу делови од Европа, што ќе го намали притисокот врз енергетските системи.
Големите резерви на течен природен гас и типичното забавување на индустриската побарувачка на крајот на годината исто така помагаат да се намалат цените на енергентот. Дури и краткорочните ризици за пратките од САД, како најголем европски снабдувач со течен природен гас, не ја променија динамиката пред да заминат трговците на продолжениот викенд. Тоа ја вклучува зимската бура што се случува еднаш во деценијата, која се заканува привремено да го попречи извозот на гориво од брегот на Мексиканскиот Залив, како и повторното да го одложи рестартирањето на фабриката „Фрипорт“ (Freeport), која летово беше оштетена од пожар.
„Мечкиното време во Европа продолжува да ги компензира другите фактори“, велат аналитичарите на трговската компанија „Енерџи Денмарк“ (Energi Danmark A/S).
Од „Фрипорт“ денеска изјавија дека првичното рестартирање не се очекува до втората половина од јануари поради регулаторните одложувања. Фабриката во Тексас претходно имаше цел рестартирањето да се случи во декември, а целосната работа да биде обновена во март.
Холандскиот гас, кој претставува репер на континентот, затвори на 82,98 евра за мегават-час, што е најниско ниво од 10 јуни. Еквивалентот на Обединетото Кралство падна за 12 проценти, завршувајќи ја оваа недела со најголем пад од почетокот на септември.
Силните ветрови во делови од Европа исто така помагаат да се намали побарувачката за гас. Производството на енергија од ветер во Британија се предвидува да достигне речиси рекордно ниво во почетокот на следната недела и повторно во почетокот на јануари. Сепак, трговците внимателно ја следат разликата на цената во Европа со Азија, бидејќи испораките со течен природен гас би можеле да завршат на соседниот континент доколку енергентот стане попрофитабилен.
Инаку, постојат ризици дека Русија може да го намали и тоа мало количество гас што сè уште го испраќа преку гасоводите во Европа, по намалувањето на испораките поради строгите ограничувања во почетокот на годинава, што доведе до рекордни цени на енергијата, ги загрози економиите и ја доведе инфлацијата на највисоко ниво во последните децении.
Движење на цената на холандските испораки на гас / Bloomberg Mercury
„Ако ограничувањето на цената, планирано од Европската Унија, ги прекршува договорите меѓу ’Газпром’ и неговите договорни страни, Русија го задржува правото да размисли дали сме обврзани да ги почитуваме тие договори“, рече вчера претседателот Владимир Путин.
„Постојаниот прилив на природен гас и повисоките норвешки текови, кои треба да пополнат 80 проценти од недостигот од рускиот гас во 2022 година, како и сценариото за намалување на побарувачката за 15 проценти, изгледаат како доволни за да се преживее благата зима“, велат аналитичарите од „Блумберг интелиџенс“.
„Сепак, студениот бран, заедно со целосното запирање на преостанатите два гасовода на ’Газпром’ во Европа, може да ја поттикне нестабилноста на цените и да го исцрпи складирањето до крајот на зимата, веројатно продолжувајќи ја оваа криза во друга“, предупредуваат аналитичарите на „Блумберг“.
.webp){kind=icon}
