Зошто сè повеќе расте цената на шолја кафе?

Светската криза на трошоците за живот ги натера љубителите да се свртат кон поевтини кафиња. Но недостигот во понудата за зрна робуста го отежнува наоѓањето поволно задоволство.

Многу љубители на кафе претпочитаат висококвалитетни зрна арабика што се продаваат во кафулињата, а робуста е обично поевтина, бидејќи нејзиното дрво е потврдо и бара помала грижа, што го олеснува производството во големи количества. Оваа сорта често се користи во инстант кафе, еспресо и мелени мешавини што се продаваат во супермаркетите... Тие сега се повторно популарни бидејќи потрошувачите со ограничен буџет бараат алтернативи.

Сепак, клучните одгледувачи се борат да одговорат на зголемената побарувачка, при што периодов цените на големо ги достигнаа највисоките нивоа во речиси дванаесет години.

За потрошувачите на најголемиот европски пазар на кафе, Германија, притисокот има забележливо влијание врз малопродажните цени, при што инстант кафињата чинат речиси 20 проценти повеќе од пред една година, иако инфлацијата на цената на зрната кафе го намали темпото. Растот на цената на инстант кафето во САД исто така забави помалку од печената верзија во април.

Шансите глобалниот недостиг од робуста да се ублажи во скоро време се мали. Виетнам, најголемиот светски производител, имаше најслаба жетва во последните четири години, откако земјоделците се фокусираа на садење попрофитабилни култури, како авокадо и дуријан, за да се справат со зголемените трошоци за ѓубрива, по руската инвазија на Украина.

Недостигот од кафе ги поскапи и најевтините сорти Bloomberg

Бразил, вториот по големина одгледувач на оваа сорта, извести дека неговите посеви се погодени од суша, а исто така постои загриженост дека индонезиското производство може да настрада по обилните дождови.

И покрај тие пречки, во првите шест месеци од тековната сезона низ светот беа извезени повеќе зрна робуста отколку во последните три години - само не доволно брзо за да се одржи во чекор со поголемата побарувачка. Испораките меѓу октомври и март беа околу четири проценти повисоки отколку во истиот период во 2021-2022 година, според Меѓународната организација за кафе.

„Има таква промена на побарувачката од кафе со повисока цена, што дури и на пазарот не му одговара поголем извоз на робуста“, вели Џудит Ганес, која во Њујорк води консултантска компанија фокусирана на стоки како кафе.

Новиот тренд првпат беше забележан кај компаниите за печење што го зголемија количеството на робуста што се користи во комерцијалните мешавини за да ги надоместат повисоките трошоци за арабика и сметките за енергија. Потоа, двоцифрената инфлација во многу делови од светот ги насочи сметките за намирници на највисоко ниво во последните децении, принудувајќи некои потрошувачи да се одлучат за поевтини опции.

Цените на големо на робуста се искачија на највисоко ниво во последните 12 години Bloomberg

„Како резултат на тоа, инстант кафето робуста расте побрзо од другите сегменти на индустријата“, вели Агиналдо Лима од бразилската асоцијација на индустријата за инстант кафе, чија земја е најголем светски производител на вакви кафиња. И водечките компании на други места, како што се „Нестле“ (Nestle SA) и индиската „Тата кафе“ (Tata Coffee), исто така пријавија поголема побарувачка за инстант кафе во нивните најнови финансиски извештаи.

Иако се знае дека зрната робуста се значително погорчливи од арабика, делумно поради повисоките нивоа на кофеин, и Виетнам и Индонезија го подобрија квалитетот на зрната, што им олеснува на преработувачите да ја зголемат разновидноста на мешавините без драстично да влијаaт врз вкусот, наведува Ганес.

„Потрошувачите би можеле да откријат многу интересни вкусови пиејќи робуста, дури и ако вкусот е различен од арабика“, вели Даниел Мунари, бариста што исто така го води „Ројлати квалити кафе“ (Royalty Quality Cafe) во јужен Бразил.

„Има сладост и киселост, кои се одлично дополнување и му даваат баланс на напитокот“, рече тој.