Русија ја зголемува царината за извоз на нафта

Русија ќе ги зголеми извозните давачки за производителите на нафта во септември на највисоко ниво оваа година, со цел да ги зголеми приходите во државниот буџет преку порастот на цените на суровата нафта.

Руската влада планира да ги зголеми трошоците за извоз на нафта за 21,40 долари по тон следниот месец, четвртина повеќе отколку во август, соопшти во вторникот Министерството за финансии на земјата. Ова зголемување е еднакво на 2,92 долари за барел.

Приходите од нафтата се клучен извор на приходи за Русија, чиј буџет е затегнат поради зголемените трошоци за финансирање на војната во Украина и западните санкции. Цените на суровата нафта се зголемија на глобално ниво поради намалувањето на понудата на ОПЕК + и зголемената побарувачка. Русија, една од главните членки во групата производители, планира да продолжи со намалување на извозот следниот месец.

Овие фактори помогнаа да се забрза растот на цената на руската сурова нафта над границата од 60 долари за барел, поставена минатата година од Групата седум земји со намера да го ограничи приливот на прихофи од нафта, а истовремено да ги одржи резервите на светскиот пазар.

Според податоците на Министерството за финансии, главната нафтена мешавина во земјата „Урал“ во просек изнесувала 70,33 долари за барел во периодот од 15 јули до 14 август, со попуст од 13,90 долари во однос на глобалниот репер „брент“.

Извозната такса е само една од неколкуте давачки што ги плаќа нафтената индустрија во земјата и сочинува дел од нејзиниот вкупен приход од нафта додека Русија ја завршува повеќегодишната даночна реформа. Москва постепено го префрла даночното оптоварување од испораките во странство на производството на нафта и планира да ја укине извозната давачка во 2024 година.

Bloomberg Mercury

 

Сепак, зголемувањето на царинските давачки во американски долари, во комбинација со послабата рубља, треба да помогне да се компензира намалената продажба на руска нафта во странство во септември, а истовремено да се зголемат буџетските приходи. Руската валута беше трета најлоша меѓу валутите од пазарите во развој оваа година. Во однос на доларот падна за 25 отсто.

Во остатокот од годината, дополнителните приходи на Русија од продажбата на нафта и гас ќе достигнат околу 800 милијарди рубљи (8,1 милијарди долари) над основната буџетска линија, благодарение на повисоките цени, напиша во колумна Максим Орешкин, главен економски советник на претседателот Владимир Путин. Колумната беше објавена во понеделникот од државната новинска агенција Итар-Тасс.