.webp){kind=icon}
Запирањето на снабдувањето со руски гас за Европската унија потенцијално би можело да го намали нејзиниот БДП за дури 1,5 отсто доколку следната зима биде студена и регионот не преземе превентивни мерки за заштеда на енергија, според новите проценки на Унијата.
Европската комисија предупреди дека, во случај на просечна зима, прекинот на испораките на гас од Москва би го намалил БДП-то меѓу 0,6 и 1 отсто, се вели во нацрт-документот на ЕУ, во кој Bloomberg имал увид.
Исто така, планирана е серија препораки до земјите-членки, вклучително и намалување на користењето на греење и ладење и некои пазарни мерки, за да се компензира влијанието на можното целосно затворање од страна на Русија, најголемиот извор на увоз. Тие мерки ќе бидат доброволни, но на владите ќе им биде кажано да пријават конкретни чекори во септември. Комисијата, исто така, ќе си даде право за принудно намалување на трошоците доколку подоцна тоа се покаже како потребно.
Прочитај повеќе
Долгот на европските енергетски фирми порасна на 1,7 трилиони долари
Долгот, кој расте од пандемијата, годинава се искачи над 1,7 трилиони евра - 50 отсто повеќе од нивото пред 2020 година.
18.07.2022
Нафтата се држи над 100 долари со слаби изгледи за намалување
WTI е стабилна откако во понеделникот се искачи за повеќе од 5 отсто.
19.07.2022
„Координираниот одговор на ЕУ пред зимата и солидарноста меѓу земјите-членки би го ограничиле негативното влијание врз БДП и работните места поради евентуално големо нарушување“, наведува комисијата во нацрт-документот „Заштедете гас за безбедна зима“.
Раните мерки за намалување на побарувачката во случај на просечна зима би можеле да го ограничат негативното влијание oд нарушувањата во испораката врз БДП-то на 0,4 отсто, се наведува во проценката.
Најголемиот предизвик за ЕУ оваа зима е да обезбеди доволно резерви на гас за да се надмине најголемата побарувачка за греење и електрична енергија. Иако нивоата на складирање минатата година беа за 10 процентни поени пониски отколку во 2016-2018 година, тие во моментот се во согласност со историскиот просек, над 63 проценти, или еднакви на 46 дена зимска потрошувачка, според документот на ЕУ, што сепак може да биде променет пред објавувањето закажано за в среда.
ЕУ останува загрижена дека Русија ќе одлучи да го прекине снабдувањето како одмазда за повеќекратните санкции. Во моментот гасоводот „Северен тек 1“ е затворен поради одржување. Гасоводот работеше со само 40 отсто од капацитетот пред почетокот на поправките, а не е познато колку гасоводот би можел да продолжи да испорачува подоцна неделава.
BH Gas
Симулациите на Комисијата и операторите за гас покажуваат дека прекинот на рускиот увоз во јули би значел дека резервите на ЕУ ќе бидат пополнети на 65-71 отсто на почетокот на ноември, што е под целта од 80 отсто. Ова укажува на недостиг од 30 милијарди кубни метри гас во текот на зимата, при нормални временски услови и континуирано зголемено снабдување со течен природен гас, што значи многу висок ризик складиштата да останат празни во неколку земји-членки во април 2023 година, покажува нацрт-документот.
„Под претпоставка дека меѓународните пазари на гас остануваат нестабилни, полнењето на складиштата во летото 2023 година ќе биде голем предизвик, што пак ќе го намали капацитетот за следната зимска сезона“, посочува Комисијата. „Нивото на полнење на складиштата во октомври 2023 година би било само 41 процент“, се додава во документот.
Ограничувањата на испораките од Русија погодија 12 земји-членки и ја натераа Германија минатиот месец да го подигне предупредувањето за ризикот од гас на второто највисоко ниво на тревога. Вкупните текови од Русија во јуни биле помали од 30 отсто од просекот од 2016 до 2021 година, се наведува во документот.
