Германската влада одвои околу милијарда евра за инвестиции во суровини, бидејќи се обидува да ја намали зависноста од производителите како Кина во однос на набавките на минерали клучни за високотехнолошки и зелени проекти, изјавија за „Блумберг“ извори запознаени со плановите.
Ќе биде воспоставен процес на селекција за да се утврди кои проекти - вклучувајќи и екстракција, преработка и рециклирање минерали - ги исполнуваат барањата, велат изворите, кои не сакаа да бидат именувани. Финансирањето, кое ќе се врши преку германската државна развојна банка КфВ, ќе се реализира преку купување малцински удел.
„Проектите во Германија и во странство „ќе придонесат за безбедноста на снабдувањето со критични суровини“, рече портпаролката на Министерството за економија. Министерството не соопшти детали како ќе се структурира државниот фонд за тие цели.
Нарушувањето на синџирите на снабдување низ светот предизвикано од пандемијата и инвазијата на Украина ја изложи ранливоста на европските земји. Владата на канцеларот Олаф Шолц вети дека ќе направи дополнителни напори за да обезбеди пристап до критичните материјали на долг рок.
Тие суровини вклучуваат кобалт, бакар, литиум, силициум и ретки метали, кои се потребни за производство на микрочипови, ветерни турбини и батерии за електрични возила.
Откако германскиот парламент во петокот го одобри буџетот за 2025 година, фондот од една милијарда евра ќе биде ограничен на четири години. Инвестициите ќе бидат координирани со италијанските и француските иницијативи во секторот на суровини, велат изворите. Официјалните лица ќе се фокусираат на проекти што се во согласност со Законот за критични суровини на Европската Унија.
КфВ одби да ги коментира плановите. Се очекува банката да даде изјава за нејзината улога во управувањето со проектот на годишната прес-конференција следната недела, на 7 февруари. Во ноември, ЕУ се согласи на мерки според Законот за критични суровини за поттикнување на рударството и намалување на зависноста од која било земја.
Додека Германија допрва треба да воспостави структура за да ги организира своите инвестиции во суровини, Јапонија може да послужи како пример. Од 2004 година, Јапонската организација за метали и енергетска безбедност инвестира во складирање суровини, истражува резерви, им дава заеми на компаниите и купува сопственички удели во нив.
.webp){kind=icon}
