Продолжува падот на цената на нафтата - фокус на испораките од ОПЕК+

Нафтата се задржува во насока на ценовен пад бидејќи инвеститорите ги одмеруваат изгледите за поголема понуда на ОПЕК+ (Организацијата на земји извознички на нафта и нивните сојузници) и последиците од трговските тензии меѓу САД и Кина.

Нафтата брент се тргува близу 66 долари за барел, откако вчера се намали за два отсто, додека ВТИ (WTI - West Texas Intermediate) е нешто над 62 долара. Неколку члена на групата производители ќе бараат ново зголемување на понудата во јуни, бидејќи спорот околу почитувањето на квотите се влошува, објави „Ројтерс“ (Reuters), повикувајќи се на луѓе запознаени со ова прашање.

Растечкиот притисок во групата, особено со Казахстан, ги поттикна стравувањата од ценовна војна. Членките на ОПЕК+ ќе одржат состанок на 5 мај за да одлучат што да прават во јуни.

„Внатрешните несогласувања во рамките на ОПЕК+ ги зголемија ризиците за пад на снабдувањето со нафта, додека постојаните царински тензии продолжуваат да влијаат на макрорасположението“, рече Џоу Ми, аналитичар во истражувачки институт. „Во оваа заднина, суровата нафта може да го продолжи својот надолен тренд“. 

Нафтата месецов драстично падна поради загриженоста дека американските царини и контрамерките од нивните најголеми трговски партнери ќе ја погодат економската активност и ќе влијаат на побарувачката за енергија. Иако има знаци за смирување на тензиите меѓу Вашингтон и Пекинг, министерот за финансии Скот Бесент рече дека претседателот Доналд Трамп не понудил едноставно укинување на наметнатите дополнителни давачки.

 

Во моментов нема коментари за веста. Биди прв да коментира...

Остави коментар