Берзански преглед на Блажековиќ: Банкарските акции двигатели на растот на МБИ 10

Во најновиот преглед на пазарот на капитал во регионот Адрија, фокусот на инвеститорите беше ставен на силните корпоративни потези и движењата на водечките регионални берзи. Главниот аналитичар Михаел Блажековиќ за ТВ Блумберг Адрија ги анализираше клучните настани што ја обележаа изминатата недела, истакнувајќи ја притоа важноста на прекуграничните спојувања и преземања, како и очекувањата од претстојната сезона на објавување на кварталните финансиски резултати.

Раст на „Адрис“ и регионални преземања

Главната вест на Загрепската берза секако беше продолжувањето на растот на цените на акциите на „Адрис група.“ По растот од околу 50 проценти од почетокот на годината, повластената акција продолжи да расте, а аналитичкиот тим на „Блумберг Адрија“ верува дека таа и натаму има значително повисок потенцијал за раст во однос на редовната акција. Интересно е што овој раст позитивно влијаеше и врз другите акции, пред сè врз акцијата на компанијата за кампинг „Мон Перин“. Со оглед на тоа што „Мон Перин“ поседува повеќе од два проценти од редовните акции на „Адрис“, растот на таа компанија директно се одразува и врз нивната пазарна капитализација и резултатите во последните шест месеци.

Кога станува збор за останатите пазари во регионот, на Белградската берза беа забележани активности околу „Месер техногас“, еден од најзначајните учесници во индексот BELEX15. Во Словенија ситуацијата е во знакот на потенцијални консолидации. Имено, компанијата „Еквинокс“  сака да ја преземе „Покојнинска дружба“. A, аналитичарите гледаат голем простор за консолидација и очекуваат дека на тој пазар веројатно ќе дојде до таа аквизиција. Од друга страна, берзите во Сараево и Бања Лука бележат вообичаено помала ликвидност и отсуство на позначајни вести.

Дека инвеститорите се мошне заинтересирани за регионот, најдобро покажуваат меѓурегионалните преземања. ЦИАК неодамна презеде една српска фабрика за мазива, додека една словенечка компанија ја презеде хрватската  градежна компанија „Бетон Лучко“. Ваквите потези на менаџерите покажуваат високо ниво на економска активност и интеграција во рамките на регионот Адрија.

Банкарски сектори и глобални притисоци

Покрај корпоративните преземања, растот на индексите е видлив не само во Хрватска, туку и во Северна Македонија. Македонскиот индекс бележи раст првенствено поради скокот на цените на акциите на банките. Поради очекуваниот раст на каматните стапки од страна на Европската централна банка и американските Федерални резерви, банкарскиот сектор би можел повторно да остварува значително поголема заработка од разликата меѓу активните и пасивните каматни стапки.

 

На глобалната сцена, главниот фокус и натаму останува на движењето на цените на енергенсите и обврзниците. Цената на нафтата се движи на нивоа од околу 97 до 98 долари за барел, додека приносите на обврзниците продолжуваат да растат. Приносите на американските десетгодишни обврзници достигнаа ниво од околу 5,3 проценти, а на германските околу 3,6 проценти, оставајќи го отворено прашањето кога ќе запре овој тренд на раст.

Очекувања од сезоната на резултати и енергетиката

Пред инвеститорите сега е почетокот на сезоната на објавување на кварталните резултати. Според Блажековиќ, аналитичарите очекуваат раст на заработката на компаниите од индексот S&P од дури 24 проценти, што е значително пооптимистично отколку на почетокот на кварталот. Доколку продолжи позитивниот тренд на американскиот пазар, се очекува тоа расположение да се пренесе и на берзите во регионот.

Важен фактор за целокупната економија остануваат и цената на гасот и сигурноста на снабдувањето. Иако моменталната пополнетост на складиштата за гас е околу 71 процент, а во Германија 57 проценти, што е пониско од долгогодишниот просек, аналитичарите не го сметаат тоа за значаен проблем. Енергетски интензивните индустрии во Германија ја намалија потрошувачката на гас, делумно поради преминот кон други извори на енергија, но и поради падот на самото индустриско производство и побарувачката, со што сегашните нивоа на залихи всушност се во согласност со очекувањата.

 

- Целиот разговор погледнете го во видеото.