„Морган Стенли“ предвидува раст од 70 отсто на акциите на АСМЛ

„Морган Стенли“ го изнесе своите биковски аргументи зошто инвеститорите би требало да купуваат акции на АСМЛ (ASML Holding NV), велејќи дека во најоптимистичкото сценарио акциите би имале раст од 70 проценти бидејќи производителите на чипови ги зголемуваат трошоците за да ја задоволат зголемената побарувачка за вештачка интелигенција (ВИ).

Холандскиот производител на полупроводничка опрема е еден од најдобрите избори на акции на банката. Аналитичарите на „Морган Стенли“ рекоа дека се уште попозитивни откако „Тајван семикондактор“ (Taiwan Semiconductor Manufacturing Co.), најголемиот клиент на АСМЛ, покажа дека бумот на трошење на ВИ не забавува. Акциите на АСМЛ се зголемија за 25 проценти од почетокот на 2026-та, што означува силен почеток на годината.

 

„Повисоките капитални трошоци за леарници и меморија во 2027 година, како и побарувачката во Кина, која е подобра од очекуваната, го поттикнуваат нашето убедување“, напишаа вчера аналитичарите, вклучувајќи го и Ли Симпсон.

Во биковското сценарио на банката, акциите на АСМЛ би можеле да достигнат и до 2.000 евра, ако профитот ги надмине нивните очекувања, а вредностите на технолошките компании продолжат да растат. Нивниот основен случај е дека акцијата ќе ја достигне целната цена од 1.400 евра, што е втора највисока проценка меѓу брокерите на Волстрит, според податоците собрани од „Блумберг“.

Bloomberg Mercury

 

Акциите на АСМЛ денеска пораснаа за 1,2 отсто, на 1.163 евра. Пазарната вредност на компанијата оваа недела надмина 500 милијарди долари, станувајќи трета европска компанија што ја достигнала таа граница.

Големиот профит е поттикнат од интензивната побарувачка за специјализирана опрема за производство на чипови на АСМЛ. Прогнозите за „Тајван семикондактор“, кои се посилни од очекувањата, оваа недела предизвикаа нов бран оптимизам во врска со трошењето за ВИ. Дополнително, САД и Тајван се согласија за долгоочекуваниот трговски договор со кој тајванските компании за полупроводници ќе го зголемат финансирањето за американските операции за 500 милијарди долари.

Освен горенаведеното, повисоките цени на мемориските чипови ќе доведат до поголемо зголемување на капацитетите кај производителите на мемориски чипови и ќе ја зголемат побарувачката за алатките на АСМЛ, соопшти „Морган Стенли“. Продажбата на АСМЛ на кинеските производители на чипови исто така е подобра од очекуваната, велат аналитичарите.