Македонија ја губи борбата со корупцијата - пад од 12 места на листата на Транспаренси

Македонија губи во борбата со корупцијата. Земјата лани забележа пад од 12 места на листата на Транспаренси Интернешнл во однос на 2023 година. Индексот на перцепција на корупцијата лани паднал за два поени и сега Македонија се наоѓа на 88 место од вкупно 180 држави. На истото место се и Казахстан, Суринам и Виетнам.

„Овие негативни резултати се последица на големиот број скандали кои се случија минатата година, а особено во областа на судството, Судскиот совет и Академијата за судии и јавни обвинители. Неказнивоста на високата корупција поврзана со лица на јавни позиции, индициите за политичко влијание на судството, лошата контрола на Судскиот совет кој ја врши врз судиите и 40-те препораки на Оценската мисија на ЕУ, кршењето на законот со изборот на кандидати за Академијата за судии и јавни обвинители за време на избори, се само дел од скандалите што го тресеа судството. Минатата година имавме и докажан случај на корупција на еден врховен судија, разрешување на кривичен судија од кавадаречкиот суд кој се слушнал 97 пати со обвинет на кого му судел и уште неколку случаи кои што се само загребување на површината на судството во кое граѓаните очигледно немаат доверба“, изјави претседателот на Транспаренси интернешнл Благоја Пандовски.

Според премиерот Христијан Мицкоски, овој извештај е логичен и добро е што падот изнесува само два поени.

„Мислев дека е повеќе после сите злоупотреби на европско знаме, коруптивни скандали кои беа во периодот на минатата влада. Ако ги забележите сите седум критериуми, ќе видите дека сите се однесуваат за периодот кога е претходната влада. Детално го изанализирав и тоа е добра основа од каде што сега ќе можеме да почнеме да ја подобруваме нашата позиција“, истакна тој.

Најави дека на денешната Владина седница ќе го задолжи ресорниот министер, јасно да ги детектира слабостите и во иднина да не се повторуваат.

„Нема да ни се повтори повеќе „Соравија“ во центар на Скопје, измени на Кривичен законик со злоупотреба на европско знаме, ниту бентли, „астон-мартин“ и „ролс - ројс“ автомобили на блиски роднини на нашите семејства. Нема да ни се повторат наместени тендери, парцели за фотонапонски централи на високи владини функционери..., Тоа е нотирано во овој извештај и за нас претставува добра основа за понатаму да следиме дали ќе напредуваме или ќе бидеме полоши“, нагласи Мицкоски.

Словенија најдобра, БиХ најлоша во регионот

Од земјите во регионот, најдобро рангирана е Словенија која се наоѓа на 36 место на листата. Во однос на 2023 година, индексот за земјата бележи раст од четири поени. Следна е Грција, која стагнира на 59 позиција со 49 индексни поени. Најлошо рангирана е Босна и Херцеговина, која бележи пад од 2 поени и е на 114 позиција со 33 индексни поени.

Најголем скок, од пет поени, од земјите во регионот има Албанија и е на 80 позиција со 42 индексни поени. Раст има и Косово од 3 поени и е на 73 позиција со 44 индексни поени.

Србија има пад од еден поен и е на 105 позиција со 35 индексни поени, исто како и Хрватска која има пад од 3 поени и е на 63 позиција со 47 индексни поени и Бугарија, која бележи пад од 2 поени, и е на 76 позиција со 43 индексни поени. Црна Гора стагнира е на 65 позиција со 46 индексни поени.

Највисоко рангирана и годинава останува Данска со 90 индексни поени, по што следат Финска со 88 и Сингапур со 84 поени. На последно место е Јужен Судан со 8 индексни поени, додека пред него се Сомалија со 9 и Венецуела со 10 индексни поени.

Индексот на перцепција на корупцијата (ИПК) за 2024 година покажува дека корупцијата е опасен проблем во секој дел од светот, но промените на подобро се случуваат во многу земји.

Додека 32 земји значително го намалиле нивото на корупција од 2012 година, има уште многу работа што треба да се заврши – 148 земји остануваат на истата позиција или бележат влошување во истиот период. Глобалниот просек од 43, исто така, стои во место со години, додека над две третини од земјите имаат резултат под 50. Милијарди луѓе живеат во земји каде што корупцијата уништува животи и ги поткопува човековите права.

Истражувањето исто така открива дека корупцијата е главна закана за климатските активности. Го попречува напредокот во намалувањето на штетните емисии и во приспособувањето на неизбежните ефекти од глобалното затоплување.

 

Текстот е ажуринан со изјавите на претседателот на Транспаренси интернешнл Благоја Пандовски и премиерот Христијан Мицкоски

Во моментов нема коментари за веста. Биди прв да коментира...

Остави коментар