Американски бомбардери полетаа од САД, се движат преку Пацификот

Бомбардери B-2 кои се невидливи за радарите полетаа од САД и се движат над Пацификот, пренесуваат повеќе медиуми, додека претседателот Доналд Трамп размислува за можно американско вклучување во војната меѓу Израел и Иран.

Како што објави „Волстрит џурнал“, летовите, кои беа забележани преку услуги за следење на авионски летови во саботата, укажуваат на тоа дека администрацијата ги подготвува бомбардерите на военото воздухопловство за евентуален напад врз Иран. Според извештаите, авионите, придружени од танкери за надополнување гориво во воздух, можеби се на пат кон базата во Гуам.

Шпекулациите за можен американски напад врз иранската нуклеарна програма се насочени токму кон бомбардерите B-2, кои се единствените способни да фрлат бомби од 30.000 фунти — таканаречени „пробивачи на засолништа“ — доколку Трамп одлучи да го нападне силно утврдениот објект за збогатување ураниум во Фордо. Израел, кој сака да ја уништи нуклеарната способност на Иран, не располага со вакво оружје.

Според „Њујорк тајмс“, неколку B-2 биле во воздух и се движеле преку Пацификот од воздухопловната база Вајтмен во Мисури. „Тајмс“ се повика на објави од следители на летови на социјалните мрежи и комуникации со контролата на летот.

Пентагон и Белата куќа не одговорија на барањата за коментар.

Трамп треба да се врати во Белата куќа во сабота и да се сретне со својот тим за национална безбедност.

Американскиот претседател испрати мешани сигнали — ги отфрли европските напори за дипломатско решение меѓу Израел и Иран, но не ја исклучи можноста за американско вклучување во конфликтот.

„Им давам одреден период“, изјави Трамп во петокот пред новинарите. „Би рекол дека максимумот е две недели.“

Во моментов нема коментари за веста. Биди прв да коментира...

Остави коментар