Брифинг на Пентагон: Какво оружје беше користено во операцијата „Полноќен чекан“

Американскиот секретар за одбрана Пит Хегсет, зборувајќи пред новинарите во Пентагон, изјави дека операцијата во саботата „бараше голема прецизност и највисоко ниво на оперативна безбедност“, пренесува „Блумберг“.

Хегсет исто така рече дека нападите, наречени „Операција полноќен чекан“, ја означуваат првата борбена употреба на т.н. бомба за пробивање бункери („bunker-buster“).

„Во тој поглед, ова беше историски момент – напад кој ја вклучи најдолгата мисија на бомбардерот B-2 Spirit од 2001 година наваму, и првото оперативно користење на MOP – масивниот пробивачки експлозив (massive ordnance penetrator)“, изјави Хегсет.

Последен пат кога бомбардери B-2 извршија толку долга мисија беше веднаш по терористичките напади на 11 септември 2001 година врз САД. Тогаш беа користени за напади врз Авганистан.

Генералот Дан Кејн, претседател на Заедничкиот штаб на САД, изјави за новинарите дека американска подморница испукала повеќе од дваесет крстаречки ракети томахавк врз нуклеарниот објект во Исфахан.

Хегсет исто така рече дека иако финалната процена на штетата сè уште не е завршена, „сите наши прецизни проектили го погодија она што сакавме да го погодат и постигнаа очекуван ефект.“

Пентагон тврди дека оваа мисија нема за цел промена на режимот во Иран

„Мисијата не беше, и не е, за промена на режимот“, рече Хегсет. „Претседателот одобри прецизна операција за неутрализирање на заканите по нашите национални интереси кои произлегуваат од иранската нуклеарна програма.“

Секретарот за одбрана Пит Хегсет истакна дека претседателот Трамп „ја даде на Иран секоја можност, но, за жал, се соочи со ѕид на игнорирање“.

„Во еден момент тој сфати дека мора да се преземе конкретна акција за да се минимизира заканата“, додаде Хегсет.

Претседателот Трамп во четвртокот рече дека ќе му даде на Иран „две недели“ да се врати на преговарачка маса, но нападот го нареди два дена подоцна.

На прашањето какви безбедносни мерки се преземаат за заштита на американските трупи на Блискиот исток, генералот Кејн одби да коментира. Но додаде дека САД делуваат „проактивно, а не реактивно“ во заштитата на своите војници во регионот.

Кејн рече дека имало ограничена координација со Израел откако операцијата започнала:

„Се погриживме да не сме во истиот воздушен простор. Освен тоа, толку беше целата соработка“, изјави тој.

Хегсет додаде дека САД се во контакт со Иран:

„Постојат и јавни и приватни пораки кои директно ѝ се испраќаат на иранската страна преку повеќе канали, давајќи им секоја можна можност да се вратат на преговарачката маса.“

Тој истакна дека Иран „сигурно се соочува со реалноста дека авиони полетале од срцето на Америка, од Мисури, и преку ноќ, целосно незабележани, прелетале над три од нивните најчувствителни објекти.“

„Веруваме дека тоа ќе има јасен психолошки ефект врз нивната перцепција за иднината“, предупреди Хегсет.

Во моментов нема коментари за веста. Биди прв да коментира...

Остави коментар