Првиот електричен „ренџ ровер“ стигнува на пазарот по цена над 170.000 евра

Првиот електричен „ренџ ровер“ (Range Rover) на компанијата ЈЛР (Jaguar Land Rover Automotive Plc) ќе чини 154.070 фунти (околу 170 илјади евра), што ќе покаже колку се подготвени имотните купувачи да издвојат за голем луксузен теренец на батерии.

Нарачките за еден од најскапите електрични теренски модели на пазарот сега се отворени, а неговата цена е речиси 70.000 евра повисока од стандардната верзија со мотор со внатрешно согорување. „Ренџ ровер електрик“ (Range Rover Electric) според тест-условите може да помине 599 километри со едно полнење, додека за полнење на батеријата од 10 на 80 отсто се потребни 22 минути.

Првата електрична понуда на „Јагуар ленд ровер“ започнува од 150.000 фунти | Jaguar Land Rover Automotive Plc

Новиот модел ќе биде своевиден тест на пазарот на големи луксузни електрични возила во момент кога побарувачката за автомобили на батерии е нерамномерна, вклучувајќи го и сегментот на луксузните производители. По цена е сличен на електричниот „мерцедес Г 580“ (Mercedes G 580), а не е далеку ниту од ултралуксузните модели со мотори со внатрешно согорување, како „бентли бентајга“ (Bentley Bentayga).

„Сметаме дека цената е конкурентна и дека ’ренџ ровер’ е позициониран на вистинскиот начин на американскиот пазар“, изјави оперативниот директор Најџел Бленкинсоп во интервју за „Блумберг“ (Bloomberg TV). Компанијата има намера во следните пет-шест месеци да произведе меѓу 12.000 и 15.000 возила, додаде тој. Минатата година беа продадени речиси 200.000 возила „ренџ ровер“.

Досегот, сепак, не е најдобар во класата на електрични теренски возила. БМВ иХ3 (BMW iX3), на пример, според тестните услови може да помине и до 800 километри со едно полнење.

Високата цена дополнително го одвојува „ренџ ровер електрик“ од значително попристапните теренски модели од Кина, кои забрзано го освојуваат британскиот пазар. „Џаеку 7“ (Jaecoo 7) на кинеската компанија „Чери“ (Chery Automobile) брзо стана еден од попопуларните модели во Велика Британија, добивајќи дури и прекар „тему ренџ ровер“, како значително поевтина алтернатива на британскиот автомобил.

ЈЛР, кој е во сопственост на индиската компанија „Тата“ (Tata Motors Passenger Vehicles), ќе може полесно да одговори на евентуалните осцилации во побарувачката бидејќи електричната верзија ќе се произведува на истите производствени линии во фабриката во Солихал, во Западен Мидлендс, како и моделите „ренџ ровер“ со класичен и хибриден погон.

Електричниот „ренџ ровер“ ќе се склопува на истите производствени линии во Солихал како и хибридните верзии и верзиите со мотор со внатрешно согорување | Jaguar Land Rover Automotive Plc

Тоа е добра вест за британската индустрија во момент кога автомобилското производство го следат неизвесноста по брегзитот и сè уште високите трошоци. Истовремено, плановите на БМВ производството на електричниот „мини“ (Mini) да го премести од Кина во Оксфорд и понатаму се неизвесни.

Околу 9.000 работници во фабриката во Солихал се обучени за производство на електрични возила, соопшти ЈЛР, како и уште 1.500 вработени низ Западен Мидлендс. Соработникот ЕПМЦ (Electric Propulsion Manufacturing Centre) во блискиот Вулверхемптон произведува батериски пакети и електрични погонски единици.

Почетокот на производството на новиот модел ќе претставува олеснување за ЈЛР откако најголемиот британски производител на автомобили минатата година претрпе сериозен сајбер-напад поради кој неговите фабрики беа затворени со недели. Компанијата истовремено се соочуваше со повисоки американски царини и пад на побарувачката во Кина.

Новиот „ренџ ровер електрик“ може да забрза до 97 км/ч за само 4,3 секунди | Jaguar Land Rover Automotive Plc

Под водство на новиот извршен директор П.Б. Балаџи (P. B. Balaji), ЈЛР уште посилно го насочува вниманието кон САД, својот најголем пазар. Во рамките на таа стратегија производителот планира и хибридни верзии на „ренџ ровер“ и „дифендер“ без можност за приклучно полнење. „Дифендер“ (Defender), робусниот теренец чија нова генерација беше претставена во 2019 година, се произведува во Словачка.

Новиот „ренџ ровер електрик“ може да забрза до околу 97 км/ч за само 4,3 секунди, додека за забрзување од околу 80 до 121 км/ч му се потребни само 2,7 секунди.

Тоа нема да биде единствената голема премиера што ЈЛР ја планира годинава. Компанијата подготвува и враќање на брендот „Јагуар“ (Jaguar) со целосно нова електрична гама, чиј прв автомобил ќе биде претставен во наредните месеци. Првото промотивно видео на новата стратегија на „Јагуар“ предизвика критики, вклучувајќи и критики од американскиот претседател Доналд Трамп, поради користењето модели без изрази на лицето и фактот дека во рекламата не се појавија автомобили.