Реткиот часовник „ролекс милгос“ (Rolex Milgauss) е продаден за 2,5 милиони долари, соборувајќи го со тоа рекордот за највисока сума платена на аукција за часовник на швајцарскиот бренд, направен за научници.
Часовникот од не’рѓосувачки челик, произведен во 1958 година и дизајниран да им се спротивстави на магнетните полиња, има црн бројчаник во облик на саќе, ротирачка рамка и стрелка за секунди во облик на гром. „Милгос“ беше еден од најскапите часовници продадени за време на викендот на аукции на часовници во Женева. Тој во саботата беше продаден од „Филипс аукшнерс“ (Phillips Auctioneers) на понудувач за 2,24 милиони швајцарски франци, што е рекорд за кој било „милгос“ и е цена двојно повисока од процената пред аукцијата од еден милион франци.
Слична верзија од 1958 година беше продадена во „Кристи“ (Christie’s) во 2013 година, за 317.000 франци. Друг продаден часовник од страна на „Филипс“ во 2022 година достигна нешто повеќе од 300.000 франци.
Според лица запознаени со ова прашање, победникот на наддавањето, кој ја надмина ривалската понуда од САД, го купил часовникот во име на „Ролекс“. Иако „Блумберг“ контактираше со одговорните од „Ролекс“, компанијата одби да коментира.
Не е невообичаено компаниите за луксузни часовници да купуваат свои часовници на аукции за нивните архивски збирки или музеи.
„Ролекс“ во март ја укина најновата верзија на „милгос“. Антимагнетниот часовник е создаден за луѓе што работат во лаборатории и никогаш не бил толку популарен како другите „професионални“ модели на „Ролекс“, направени за нуркачи во длабоко море, пилоти или возачи на тркачки автомобили.
На почетокот на 1950-тите научниците од Европската организација за нуклеарни истражувања (Conseil Européen pour la Recherche Nucléaire), попозната како ЦЕРН, се обратиле до производителот на часовници за да се конструира часовник според нивните потреби. Научниците од ЦЕРН побарале рачен часовник што може точно да го каже времето дури и во присуство на силни магнетни полиња. „Ролекс“ го произведе првиот „милгос“ во 1956 година. Со рамка од меко железо, што го опкружува движењето во куќиштето, тој беше именуван според неговата способност да издржи изложеност од дури 1.000 гауси или „mille gauss“ на француски.
„Никој познат не носи 'милгос'. Тоа е часовник за научниците“, рече Траина, која е кодомаќинка на поткаст за аукциите на часовници и секундарниот пазар наречен „Сингнификант вочис“ (Significant Watches).
.webp){kind=icon}
