Пред повеќе од 70 години, производителите на спортска опрема од Германија, браќата Адолф и Рудолф Даслер се скараа, што доведе до поделба на нивната компанија на „Адидас“ и „Пума“. Се вели дека несогласувањето добило такви размери што членовите на семејството што ги воделе „Пума“ и „Адидас“ оделе во одделни пекари, месарници, пабови.
Освен што целосно ги подели жителите на Херцогенаурах, градот во кој беа основани компаниите, а со тоа и работниците кои работеа во фабриките на спротивните страни на градот, ривалството засекогаш ја промени и индустријата за спортски производи. Најзначајниот настан што дополнително го поттикна ривалството беше „Пактот Пеле“, каде што двете страни се согласија да не го потпишат Пеле за Светското првенство во фудбал во 1970 година, верувајќи дека војната за најпознатиот спортист на светот ќе биде прескапа. Сепак, „Пума“ го прекрши пактот и потпиша договор со Пеле, чија популарност и победа на Бразил таа година во голема мера придонесе за подобрување на имиџот на „Пума“ и доведе до зголемување на продажбата.
До оваа година, „Пума“ го надминуваше својот ривал „брат или сестра“ секоја година од 2016 година наваму. Но, сега и со раст од 13 проценти, сепак е далеку зад растот од 21 проценти што го постигна „Адидас“, кој доживува пресврт под водство на поранешниот шеф на „Пума“, Бјорн Гулден.
„Пума СЕ“ воведува нови производи за трчање, кошарка и фудбал оваа година со надеж дека Олимписките игри и големите фудбалски турнири и во Европа и во Америка би можеле да обезбедат одредено олеснување. Исто така, со цел да го забрза повторното пристапување кон специјализираниот пазар, брендот неодамна ја започна својата прва глобална кампања по десет години. „Засекогаш. Побрзо.- Погледнете ја играта како ние“ има намера да ја позиционира „Пума“ како најбрз спортски бренд во светот.
Пума
Кои патики водат до победничкиот пиедестал?
Секако, тие не се единствените кои ги користат глобалните спортски настани кои ветуваат жешко лето во Париз, туку и на други терени, за промоција на нивните брендови, спортистите - бренд амбасадори и секако производите. Тоа е, исто така, можност за брендовите да се вратат на нивната основна мисија во нивната маркетинг стратегија и промотивен наратив: производство на облека и обувки кои овозможуваат најдобри резултати во спортот.
„Треба да го изостриме нашиот фокус на спортот“, рече Џон Донахо, извршен директор на „Најк“, во финансискиот извештај за првиот квартал. Во април, брендот премиерно ги претстави своите нови производи специјално дизајнирани за специфични спортови: „алфафлај“ (Alphafly) и 41-от модел на неговите патики „пегасус“ (Pegasus), се централен дел од иновациите на „Најк“ за маратонци. „Најк пегасус премиум“ (Nike Pegasus Premium) беше прикажан на Самитот за уметнички иновации во Париз, што ја докажува намерата на компанијата поагресивно да го забрза освојувањето на специјализираниот пазар пред Олимпијадата.
Но, за „Најк“ ова не е единственото „забрзување“. Шок и емотивни реакции во јавноста на почетокот на годинава предизвика веста дека овој американски бренд ги спонзорира дресовите на германската фудбалска репрезентација, а не „Адидас“ кој е спонзор повеќе од 70 години. Според извештаите на германскиот печат, „Најк“ се согласил да плаќа околу 100 милиони евра годишно за набавка на опрема, со што се удвојува спонзорството на „Адидас“ од 50 милиони евра. Германскиот фудбалски сојуз (ДФБ) изјави дека причините за овој револуционерен пресврт се од економска природа, а останува да се види како „Најк“ ќе ја искористи оваа победа на теренот на противникот. Од 2027 година, кога стартува овој договор, пругите на „Адидас“ и црно-црвено-златното би можеле да бидат заменети со нов дизајн со препознатливото лого на „Најк“, за кое веќе има различни шпекулации.
Отприлика во исто време, „Најк“ се најде на удар на критики за промените во англиската национална гарнитура, особено крстот на Свети Џорџ, чија хоризонтална лента сега е комбинација од сина и виолетова наместо црвената од оригиналното знаме. Дури и премиерот Риши Сунак се вклучи во дебатата за боите на дресот на англиската фудбалска репрезентација, велејќи дека крстот не треба да се менува и дека оригиналот е симбол на националната гордост. Со тоа се согласува и неговиот главен ривал на штотуку објавените општи избори во Велика Британија закажани за 4 јули, лидерот на Лабуристичката партија, Сер Кир Стармер, кој вели дека знамето го користат сите, „тоа е обединувачко и не треба да биде сменето". „Најк“ соопшти дека сакале само малку да го „разиграат“ дизајнот, а историски не се единствени кои интервенирале со боите на знамето. Дизајнерката Стела Макартни, исто така, се најде на удар на критиките откако го дизајнираше дресот на тимот на Велика Британија за Олимпијадата во 2012 година, користејќи ја сино-бела верзија на Унион Џек.
Додека двајца се расправаат, третиот има корист
Но, се чини дека и во овој случај важи изреката: додека двајца (во овој случај, повеќе од двајца) се расправаат, третиот користи. Основана пред нешто повеќе од една деценија, „Он Холдинг АГ“ (On Holding AG) брзо се прошири низ Европа и Северна Америка, делумно благодарение на силната мрежа на партнери на големо и специјализирани продавници. Со оглед на тоа дека е поддржана од партнерство со Роџер Федерер, компанијата пред се го зајакнува своето присуство во тенисот, па така дваесет и двегодишниот тенисер Флавио Коболи неодамна им се придружи на спортистите кои соработуваат со брендот. Коболи, кој играше фудбал за академскиот тим на Рома како тинејџер пред да го насочи целото внимание на тенисот, моментално е рангиран на 57. место светот. Тој ќе почне да ја носи опремата на „Он“ на претстојниот турнир Ролан Гарос кој почнува на 26 мај во Париз, информира за Блумберг, Џилијан Тан. Компанијата неодамна објави квартален приход од 508 милиони швајцарски франци, што е зголемување за 29 проценти на годишно ниво и над очекувањата на пазарот, како што објави „Блумберг“. Акциите на компанијата скокнаа за 18 проценти откако објави силна заработка во првиот квартал и малку ја зголеми прогнозата за продажба за годината. Компанијата се надева дека ќе ја зголеми свеста за брендот и на Олимписките игри во Париз ова лето, делумно благодарение на спонзорираните спортисти во атлетика, триатлон и тенис.
„Тоа е дел од поширокиот тренд на фрагментација во спортскиот сектор, каде што помалите брендови ги освојуваат потрошувачите во тесни сегменти како трчањето со модерни опции за обувки. Тоа создава криза на идентитетот за традиционалните играчи како „Најк“, „Адидас АГ“ и „Пума“, кои мора да најдат начин да им се допаднат на масите на сè понагласениот пазар“, рече Пирал Даданија, аналитичар во „РБЦ Капитал Маркетс“ (RBC Capital Markets), пренесува „Блумберг“.
И додека „големите“ брендови се соочуваат со ривали на сите фронтови, некои играчи потпишуваат договори со кинески производители, како што неодамна објави „Блумберг Адрија“.
.webp){kind=icon}
