Пазарната капитализација на францускиот производител на висока мода „Хермес“ (Hermès) ја надмина пазарната капитализација на конкурентската компанија ЛВМХ (LVMH / Moët Hennessy Louis Vuitton), конгломерат што пред 15 години се обиде да го преземе производителот на култните чанти „биркин“.
Вредноста на компанијата „Хермес“ во понеделникот достигна 243,65 милијарди евра, со што накратко ја надмина вредноста од 243,44 милијарди евра на ЛВМХ, што ја лансира меѓу највредните компании на францускиот референтен индекс CAC40.
До овој изненадувачки пресврт дојде откако акциите на ЛВМХ во Париз паднаа за дури 8,35 проценти, разочарувајќи ги инвеститорите поради послабите резултати во првиот квартал, поради забавената побарувачка во Кина и САД, како и поради заканите од заострување на трговската војна.
Прочитај повеќе
Зошто стана толку тешко да се купи „биркин“ или „кели“ чанта?
Култната чанта „биркин“ стана толку барана и недостапна што двајца незадоволни купувачи во Калифорнија го тужеа производителот „Хермес“.
22.09.2024
„Хермес“ доби тужба од купувачи зашто е премногу тешко да се купи чанта „биркин“
Раскошните француски чанти „биркин“ се статусен симбол за богатите луѓе низ светот и може да достигнат цена од над 100.000 долари.
22.03.2024
За „Хермес“ ова е потврда на неговата стратегија за независност, откако во 2010 година Бернард Арно, мнозински сопственик на ЛВМХ и мултимилијардер, откри дека суптилно купувал акции на познатиот производител на свилени шалови.
Потегот на Арно ги поттикна членовите на семејството Хермес да ги здружат силите, што на крајот го принуди човекот, кој поради неговите често немилосрдни преземања на престижни брендови го нарекуваат Волкот од Кашмир, неколку години подоцна да ги продаде своите акции.
ЛВМХ, кој е сопственик на брендови како „Кристијан Диор“ (Christian Dior) и „Тифани“ (Tiffany & Co), пријави приход од 84,7 милијарди евра во 2024 година и оперативен профит од 19,6 милијарди евра. „Хермес“ во истиот период оствари приход од 15,2 милијарди евра и оперативен профит од 6,2 милијарди евра.
Падот на побарувачката за луксуз „Хермес“ го издржа подобро од конкуренцијата, благодарение на ориентацијата кон најбогатата клиентела и негувањето на имиџот на ексклузивност и контролирана достапност на производите.
Бизнис-моделот на ограничена понуда резултираше со поголема побарувачка за чантите „биркин“, именувани по покојната британска пејачка и актерка Џејн Биркин, и чантите „кели“, инспирирани од принцезата Грејс Кели.
Овие чанти во Париз се продаваат за околу 10.000 евра, додека на секундарниот пазар можат да достигнат значително повисока цена. „Хермес“ е основан во 1837 година како производител на опрема за јавање, што денес му дава силна ценовна моќ и создава долги листи на чекање за неговите производи.
Наспроти тоа, вреднувањето на ЛВМХ, според мислењето на аналитичарите, можеби е погодено од таканаречениот конгломератски попуст, бидејќи брендовите како „Сефора“ (Sephora) остваруваат пониски маржи во споредба со клучниот бренд „Луј Витон“ (Louis Vuitton), кој е главен извор на приходи на компанијата.
Во понеделникот ЛВМХ ги објави резултатите за првиот квартал, кои беа значително послаби од очекувањата, за неговата клучна модна и кожена галантерија. „Хермес“ денеска ќе ги објави податоците за кварталната продажба.
Додека Арно често предничи на листите на најбогатите луѓе во светот – моментално е петти на индексот на милијардери на „Блумберг“ – семејството Хермес, чиј наследник е Аксел Дума, е најбогат во Европа, со проценето богатство од околу 171 милијарда долари во декември минатата година.
Во февруари пазарната вредност на „Хермес“ накратко ја надмина симболичната граница од 300 милијарди евра, но загриженоста поради трговските војни и царините од тогаш негативно влијаеше на поширокиот сектор за луксузни производи.
.webp){kind=icon}
