Пристигнува Барби(кју) сосот за скара

Ако мислевте дека барбиманијата заврши, размислете уште еднаш. Случајот секако не е затворен за „Крафт Хајнц“ (Kraft Heinz Co).

Девет месеци по прикажувањето на „Барби“ (Barbie), кој заработи повеќе од 1,4 милијарда долари и стана филм со најголема заработка во 2023 година, производителот на храна се здружи со „Мател“ (Mattel Inc.) во производството на сос за скара со досетливо име „Барбикју“ (Barbiecue). Зачинот е со карактеристична розова нијанса и украсен со профилот на познатата кукла со коса врзана во опавче. Ако филмската ѕвезда Марго Роби работеше како скараџика во филмот, производот секако ќе го заземеше главното место.

„Хајнц“ го лансира „Барбикју“, кој на задната страна на шишето е дискретно опишан како „вегански мајонез на 'Хајнц' со сос за скара“, засега само во две земји, Велика Британија и Шпанија.

Во Британија се продава во ограничен број, со 5.000 производи достапни на heinztohome.co.uk од понеделник. Уште една ограничена серија на сосот ќе се продава низ целата земја во супермаркетите на „Теско“ (Tesco) од 17 април, а потоа на „Окадо“ (Ocado), онлајн услугата за испорака низ Велика Британија, од средината на мај. Вкупно, „Хајнц“ произведува околу 105.000 шишиња за Британија. Просечната малопродажна цена е 3,39 фунти за пакување од 415 милилитри.

Во Шпанија околу 12.000 шишиња сос ќе бидат достапни на национално ниво во 120 стоковни куќи „Ел Корте“ (El Corte Inglés), заедно со онлајн подароци, почнувајќи од 25 април.

Продажбата на „Мател“ се зголеми за 9,3 отсто во третиот квартал од 2023 година, на 1,92 милијарда долари, најмногу благодарение на Барби. Треската за дополнителни барбикор (Barbiecore) производи, како што се дуксери од „Гап“ (Gap) и брендирани крокс (Crocs), беше без преседан.

„Нашиот однос со Барби започна пред повеќе од една година, пред промоцијата на филмот“, рече Андре Фернандес, потпретседател за развој, европски и пацифички развиени пазари на „Крафт Хајнц“. Сепак, големите прехранбени компании не се познати по тоа што брзо се движат, па дури сега, во пролетта 2024 година, кога филмот е достапен дури и во изборот на авиокомпаниите, „Хајнц“ го објави „Барбикју“.

Компанијата првпат го процени интересот на социјалните мрежи кон крајот на летото, кога објавата на Фејсбук во Велика Британија генерираше 464.000 лајка и 71.000 коментари. „Еден обожавател дури ни кажа дека ќе ја бојадиса косата во розова ако ја освежиме скарата со трендот Барби“, вели Фернандес. Тогаш „Хајнц“ реши да го направи сосот реалност, барем за кратко. Развојот на производот траел околу шест месеци.

Почетната точка за рецептот, според Фернандес, доаѓа од навиката на клиентите да го мешаат сосот за скара „Хајнц класик“ (Heinz Classic BBQ) со мајонезот од компанијата, а бојата доаѓа од зголеменото количество на екстракт од цвекло. Резултатот е токму она што би го очекувале: густа сјајна мачканица, која има слична конзистентност како мајонез, со слаткаст вкус на чаден производ.

Производот е лансиран во Британија и во Шпанија бидејќи токму таму „Хајнц“ забележал најсилен одговор од клиентите по мини-кампањата на социјалните мрежи. Иако во моментов нема планови за продажба на сосот во САД, Фернандес вели: „Никогаш не би рекол дека никогаш нема да го лансираме на други пазари. Имавме дури и луѓе од Австралија што бараа 'Барбикју'“.

Што се однесува на другите производи на тема Барби? „Никогаш не би го исклучиле кечапот“, вели Фернандес.

Во моментов нема коментари за веста. Биди прв да коментира...

Остави коментар