Гастрономска мапа на Дубаи: Од деловни ручеци до буџетски оброци

Пронаоѓањето на вистинското место за јадење во Дубаи воопшто не е лесна задача. Само во 2024 година Емиратот издал 1.200 нови дозволи за ресторани. Оваа година ќе се отворат уште многу нови локали, бидејќи градот постојано се шири за да се приспособи на растечкиот број жители – особено на богатите странци – како и на туристите. Еве водич низ пет одлични гастрономски адреси во една од најпознатите светски дестинации, вклучувајќи и места што ги обожава локалното население. Сакате автентично искуство? Имаме такво. Немате резервација? Нема проблем.

Ново: „Гербу“ (Gerbou), Над ал Шеба

„Приближете се.“ Така се преведува арапскиот израз гербу, кој во Обединетите Арапски Емирати се користи како поздрав за добредојде. Верeн на значењето на своето име, ресторанот нуди топла атмосфера на висока гастрономија, со богат избор на емиратски и современи арапски јадења. Сместен е во обновена зграда со кремави ѕидови и двор, во сè попопуларниот кварт Над Ал Шеба, каде што живее и престолонаследникот, шеикот Хамдан бин Мохамед. На почетокот на годинава таму седнал на оброк и неговиот татко – владетелот на Емиратот, шеикот Мохамед бин Рашид ал Мактум.

На менито се издвојуваат традиционални специјалитети како емиратско јагнешко тарид (90 дирхами) – бавно варено месо и зеленчук со зачини, како и вкусниот праун бирјани (110 дирхами). Тука има и помали залачиња како палестинска мусака со пилешко (60 дирхами) и бахреински ќебап луми (90 дирхами). Не се служи алкохол, но има креативни безалкохолни коктели, како дезерт роуз (55 дирхами) и ладен чај од хибискус (35дирхами). Популарен е и локалниот чај карак (15 дирхами), зачинет со цимет и кардамон. (gerbou.com)

Стилизиран колач во „Гербу“ | Gerbou

Бизнис-ручек: „Кафе Батил“, ДИФЦ

Со 15 локации низ градот, никогаш не сте далеку од „Кафе Батил“ (Café Bateel). Основан во 1930-тите како плантажа за урми, „Батил“ прерасна во луксузен бренд на кафулиња. Популарниот локал се наоѓа во финансискиот центар на Дубаи (Dubai International Financial Centre – DIFC). Таму често одат адвокати и бизнисмени, бидејќи е во близината на 54-катната деловна кула  „ИКД Брукфилд плејс“ (ICD Brookfield Place) – највисоката деловна зграда во Дубаи.

Менито има силно медитеранско влијание: италијански врап со говедско (98 дирхами), печени равиоли со тиква (84 дирхами), како и бурата со салата од праска (92 дирхами), која честопати се распродава до пладне. Меѓу омилените е и печениот лосос со ризото со за’атар и киноа (139 дирхами). „Батил“ наскоро ќе се прошири и надвор од Блискиот Исток, со планови за иницијална јавна понуда. (bateel.com)

Печени равиоли со тиква | Café Bateel

Без резервација: „Јаба“, Џумејра

Основач на „Јаба“ е познатиот готвач Шахин Калил, финалист на „Мастершеф“ (MasterChef UK) и ѕвезда на социјалните мрежи со 4,5 милиони следбеници на Инстаграм. Името на ресторанот потекнува од израз на нежност со кој Ирачаните им се обраќаат на своите татковци. Сместен е на улицата Ал Васл, во живописен дел од градот. Резервации се примаат само за групи од најмалку десет лица – сите други одат без најавување. Калил е специјализиран за ирачка кујна со модерен пристап.

Вечерата започнува со домашен чипс и супа од леќа како подарок од готвачот. Потоа следуваат специјалитети како црна салата (48 дирхами) со модар патлиџан и фета преку домати и зелен листест зеленчук, димени долми (120 дирхами), или јадењето руманија, старо 800 години – кратки ребра од ангуско говедо варени во сок од калинка со ориз (128 дирхами). Јадењата се богати, а презентацијата впечатлива – се служат на чинии украсени со куфиска калиграфија. (yabarest.com)

Јадења инспирирани од Ирак и куфиска калиграфија | Yaba

Добра зделка за ручек: „Ал Сафади“, Трејд центар

„Ал Сафади“ е еден од најдобрите либански ресторани во ОАЕ, а неговите пристапни цени го прават уште попривлечен. Се наоѓа во близината на центарот на Дубаи, на булеварот Шеик Зајед, и од 2000 година секогаш служи квалитетна храна.

Големото мени е погодно и за групи и за брз ручек. Тука има класични либански јадења, како салатите фетуш и табуле, хумус и баба гануш, при што ниту едно не чини повеќе од 30 дирхами. Меѓу омилените се шаварма-чиниите со говедско (48 дирхами) или со пилешко (46 дирхами), како и сендвичите (15 дирхами) со говедско, (14 дирхами) со пилешко месо. На менито има и риба сајадија со ориз (58 дирхами), како и ќебап орфали (52 дирхами). (alsafadi.ae)

Богат рибен оброк во либанскиот ресторан „Ал Сафади“ | Al Safadi

Најпопуларен: „Ал Хајма херитаж“, Ал Фахиди

„Одлична атмосфера, автентична и локална вкусна храна“, велат љубителите на ресторанот „Ал Хајма херитаж“. Сместен е во квартот Ал Фахиди, каде што архитектурата потсетува на животот во Емиратите пред еден век – ниски градби и кули за ладење покрај каналот Дубаи Крик. Ресторанот користи локални производи, а келнерите се облечени во традиционални носии.

Името „Ал Хајма“ значи „шатор“ – што се гледа и во ентериерот. Оброците се служат во покриен, климатизиран атриум или во приватни салони со софи поставени врз персиски килими. Главните јадења вклучуваат мадфун – јагнешко рамо варено под земја (190 дирхами) и бавно варено пилешко узи (105 дирхами), со салата од рукола (35 дирхами). Во заднина, гостите ги забавуваат танчари со традиционална музика. (alkhayma.com)