Плата од над 100 илјади долари во САД треба да значи дека сте успешни, но колку се чувствувате успешни зависи од тоа каде живеете. По даноците и комуналиите, во Њујорк таквата годишна плата вреди само 36.000 долари.
Ова го покажа студијата на компанијата „Смарт асет“ (SmartAsset), која обезбедува финансиски информации за потрошувачите, при што било анализирано каде во 76-те најголеми американски градови платата од 100.000 долари вреди најмногу. На таа листа Њујорк е на последното место бидејќи во тој град таквата плата вреди само 35.791 долари. Меѓу десетте градови каде таквата плата има најниска вредност, покрај „големото јаболко“ се најдоа и другите познати метрополи како Сан Франциско, Вашингтон, Лос Анџелес, Бостон и Сиетл.
Мемфис во Тенеси е на врвот на листата на „Смарт асет“ при што по оданочувањето и трошоците за живот, 100.000 долари вредат 86.444.
Американски градови во кои животот е најскап, а 100 илјади долари не вредат многу
Bloomberg
Од „Смарт асет“ пресметале сојузни, државни и локални даноци на годишната плата од 100.000 долари. Потоа, користејќи ги податоците од Советот за заедници и економски истражувања за третиот квартал од 2022 година, ги пресметале локалните трошоци на живот, кои ги вклучуваат трошоците за домување, намирници, комунални услуги, транспорт и други стоки и услуги.
„Психолошки, шестцифрената плата од 100.000 долари изгледа како големо достигнување, но чувството варира во зависност од тоа каде живеете“, вели Сузана Снајдер, финансиски стратег и главен уредник за финансиско образование во „Смарт асет“. „Расчленувањето на сумата по градови открива како вредноста на платата варира во зависност од тоа каде живеете и како даночниот пејзаж таму влијае врз износот од шест цифри“.
Се разбира, високите плати се почести во Њујорк отколку во Мемфис. Според Бирото за попис на САД, просечниот приход на домаќинствата во Њујорк во 2021 година бил нешто повеќе од 70.000 долари. Во Мемфис, просечниот приход на домаќинствата бил околу 44.000 долари.
Но, високите цени, високите даноци и астрономските кирии, со бавниот раст на платите и речиси двегодишната непрекината инфлација, поттикнаа многу жители на големите градови убаво да размислат. Според американското биро за попис, Њујорк изгубил над 300.000 жители од јули 2020 година до јули 2021 година, а кириите таму сега растат побрзо отколку во другите градови во САД.
Даноците особено загрижуваат. Државниот финансиски супервизор Томас Динаполи предупреди дека данокот не треба повеќе да се зголемува бидејќи веќе ги истиснува богатите жители од Њујорк кои имаат најголем приход.
Многу њујорчани мигрирале во области со ниски даноци како Тексас и Флорида, особено затоа што работењето од дома им овозможи поголема слобода на движење. Тоа можеби не е лоша финансиска одлука, според истражувањето на „Смарт асет“, бидејќи во Тексас се седум од првите десет најдобро рангирани градови.
.webp){kind=icon}