Македонски стартап нуди еколошка опција за вашата луксузна гардероба

Се проценува дека до крајот на 2024 година пазарот за облека од втора рака во Европа ќе достигне вредност од 17,3 милијарди долари. Според Future Market Insights оваа индустрија ќе вреди дури 36,3 милијарди во 2034 година. На глобално ниво, пак, според податоците на американската продавница за користена облека ThredUp, овој пазар ќе достигне вредност од 350 милијарди долари до 2028 година.

Користената гардероба e се’ поатрактивна за потрошувачите и постојат неколку причини за тоа, а меѓу кои се високата инфлација, заштитата на животната средина и поседувањето уникатна облека. Најразвиен систем на собирање и продажба на половна гардероба имаат Белгија и Холандија. Иако жителите на овие држави имаат голема платежна моќ, тие имаат неверојатно одговорен однос кон парчињата што ги носат, а со тоа и кон одржливоста.

Колку Македонците се подготвени да носат облека од втора рака, одговор побаравме од Милена Неќак и Ивона Маркоска, косопственички на компанијата „Креместаре Трифт“ (Kremestare Thrift), стартап кој нуди еколошка опција за изнајмување на луксузна гардероба-свечени фустани и венчаници.

Тие велат дека жените сакаат нови креации за секоја веселба на која присуствуваат, но во исто време преферираат да не потрошат премногу средства за истите, бидејќи ваков тип на парчиња се носат еднаш до двапати и потоа „вечно“ остануваат во плакарот.

„Изнајмувањето на свечени креации е нов концепт во земјава и овој бизнис допрва треба да се позиционира на македонскиот пазар. На почетокот проекциите ни беа дека би имале две до три изнајмувања месечно, но во реалноста ги надминавме нашите очекувања“, вели Неќак.

Креместаре трифт/архива

Креместаре е термин од битолскиот дијалект кој означува закачалка за облека во форма на триаголник. Идејата за овој зелен бизнис настанала за време на ковид-пандемијата кога Неќак, одговорна за креативниот дел, почнала да препродава модни парчиња од локални инфлуенсерки, најчесто неискористени и се’ уште со етикети, кои тие ги користеле исклучиво за промотивни фотосесии. По две години ѝ се придружува Маркоска како финансиски менаџер и заеднички го официјализираат бизнисот. Нивната компанија од неодамна нуди и втора услуга-изнајмување на облека за забави „Креместаре Партивеар“ (kremestare.partywear).

„Аплициравме за грант на повикот Стартапувај 4 и добивме поддршка од Фондот за иновации и технолошки развој (ФИТР) во износ од околу 30.000 евра. Инвестиравме и лични средства, бидејќи условот на ФИТР е одреден дел од вкупно предвидениот буџет на проектот да биде покриен со сопствено кофинансирање“, открива Маркоска за „Блумберг Адрија“.

„Креместаре Партивеар“ им дава можност на македонските жени освен да купат и да изнајмат креации за специјални прилики. На потенцијалните клиентки им се нудат различни стилови и големини. Достапни се парчиња од локални дизајнери, но и од светски брендови. Велат дека нивна мисија е активно да придонесат за кружната модна економија и да промовираат одржливост. „Едноставно е. Сакаме да изгледате најдобро на секој настан, а сепак да го одржиме нашето ветување кон планетата“, пишува на нивниот сајт.

Облека не откупуваат, но отворени се за соработка со секое ателје или моден дизајнер кои ќе понудат уникатна и нова креација, по можност со се’ уште прикачени етикети. Во овие ретки случаи, плаќањето се врши само откако фустанот е изнајмен или продаден.

„Кога ги креираме цените, им гарантираме на клиентите дека ќе заштедат најмалку 50 отсто од малопродажната цена, истовремено обезбедувајќи доволно од колачот за да го одржиме нашиот бизнис и да ја продолжиме нашата мисија“, вели Неќак.

Цените за изнајмување и продажните цени се достапни на официјалниот сајт. Фустаните може и да се пробат, но со претходно закажан термин во нивното студио кое се наоѓа во Скопје. Магдалена Таневска, дизајнерка и експерт за текстил, стручно ги прави сите потребни поправки во согласност со желбата на нивните клиенти.

„Дополнително, соработуваме со компанија за хемиско чистење за да се осигураме дека нашите фустани се доведени до првична состојба. Користиме и стимер за дополнителна дезинфекција, одржувајќи ги фустаните свежи и подготвени за повторно изнајмување“, ни одговорија кога ги прашавме како ја третират веќе изнајмената облека.