.webp){kind=icon}
Македонски канти за рециклирање што истовремено може да се користат и како џубокс го освојуваат регионалниот пазар. Авторот на овој изум Димитрија Ангелков за „Блумберг Адрија“ открива дека за софтверот веќе се заинтересирани инвеститори од Србија и Бугарија, а откако објавил промотивни видеа на Јутјуб, со него контактирале и бизнисмени од Грузија и Австралија.
Станува збор за роботски систем со вештачка интелигенција. Овој уред истовремено е и паметна канта, со автоматска селекција на отпад, и автомат што овозможува да си ја одберете омилената песна, но само кога ќе фрлите пластично шише. Плеј-листата во моментов содржи 300 рефрени, од македонски народни и староградски песни до светски рок-хитови, а во понудата нема турбофолк.
Димитрија Ангелков
„Идејата беше преку интерактивност да ја издигнеме еколошката свест кај младите, но истовремено да го изостриме нивниот вкус за музика. Се радувам што македонските училишта и градинки веднаш го препознаа овој концепт и во моментов тие се нашите најмногубројни купувачи“, вели Ангелков, основач на компанијата „Интерактивна иднина“.
Прототипите се од рециклирана пластика, но за секој модел материјалот е различен, во зависност од барањата на клиентот.
Вашите омилени песни, ама не на грамофон/Depositphotos
Иако самата изработка на кантите не е воопшто скапа, тие се продаваат по 1.000 евра, а Ангелков објаснува зошто е тоа така.
„Потребни се малку средства, но истовремено се потребни дизајнерски, програмерски и мехатронички вештини за сè да биде функционално. Додека да проработи прототипот ќе поминат доста непроспиени ноќи, недели поминати во осаменост, години поминати во читање техничка литература, гледање доста инспиративни видеа“, раскажува овој доктор по компјутерски науки.
Тој е креатор и на првата паметна канта во светот што за секое фрлено пластично шише подарува храна за домашни миленичиња. Таа користи специјален модел за вештачка интелигенција, кој отпадот го препознава и го селектира во четири канти, за стакло, пластика, хартија и лименки. Храната, пак, завршува во посебен резервоар и може да послужи како оброк за кучиња.
Ангелков тврди дека неговите паметни канти никогаш не грешат и дека селекцијата на отпадот почнува дури кога системот е 100 отсто сигурен.
„Моите машини препознаваат секаков отпад за помалку од три секунди. Базата од 18.000 производи се дополнува секојдневно“, вели тој.
Неговите иновации најчесто се фокусирани на решенија што нудат позитивни промени поврзани со животната средина. Последен таков проект на кој работеше е биокомпостарница, која органскиот отпад го претвора во органско ѓубриво.
Ангелков, инаку професор по роботика, микроконтролери, микропроцесори и практична настава во средно стручно училиште во Кавадарци, е познат македонски иноватор, добитник на повеќе домашни и меѓународни признанија. Негов најпопуларен изум е интерактивна училишна табла, посебно осмислен уред со специфичен софтвер што овозможува учениците и професорите да бидат еднакво активно вклучени во изучувањето на самата материја.
„Потребна ни е поголема самодоверба затоа што знаење имаме. Треба да произведуваме наместо да увезуваме. Колку за споредба, мојата паметна табла со димензии 280x122 см наместена со обука чини 12.000 денари, а тоа е трипати помалку од кинеската“, завршува тој.
