Кои се најочекуваните иновации во регионот Адрија?

Почна снимањето на втората сезона на реалното шоу за стартапи „Фаундер гејмс“ (The Founder Games). Овој уникатен телевизиски концепт, инаку комплетно македонски производ, овојпат е најавен како голем регионален проект со двојно повеќе учесници и награден фонд од 300.000 евра. Победникот добива и патување во Силициумската долина.

Шоуто ќе почне да се прикажува во септември на повеќе регионални телевизии, а креаторите најавуваат содржина која ќе биде достапна за над 100 милиони луѓе преку различни канали, стриминг платформи и социјални мрежи. 

Освен од регионот Адрија, во новата сезона ќе се натпреваруваат и стартапи од Бугарија, Албанија, Грција, Кипар, Романија, Турција, Полска и Унгарија.

„Во финалниот избор на 40 стартапи кои влегуваат во акцелераторската програма имаме неверојатна разновидност од целиот регион и пошироко кои верувам ќе го редефинираат начинот на кој работиме, живееме и комуницираме“, вели Сања Митровска, основачка на платформата „Нетворкер“ и креаторка на ова шоу.

Од рано откривање на рак до паметни пристаништа 

Од иновативни технологии за рано откривање на рак со помош на вештачка интелигенција до еко-иновации кои развиваат биоразградливи производи за лекување на изгореници, Митровска за „Блумберг Адрија“ открива какви големи идеи и визии ќе ѝ бидат претставени на јавноста до крајот на годината.

Гледачите може да очекуваат роботи направени од рециклирана пластика, но и продукти за речиси „бесплатна“ енергија за сите. Во шоуто ќе се промовираат и стартапи кои работат на IoT платформи за оптимизација на инфраструктурата и паметно управување со неискористени простори трансформирајќи ги домовите и градовите во поефикасни екосистеми. Како особено интересни, Митровска ги издвојува и следните изуми: паметни пристаништа, иновативни решенија за вештачка кожа, водич за криптовалути за почетници, уред за поедноставно производство на градежни материјали и софтвер кој ја подобрува достапноста на јавните услуги за лицата со попреченост. 

Петнаесет отсто од претприемачите, пак, целосно се насочени на пазарот на луксуз.

„Овие стартапи ќе покажат дека иновацијата и луксузот одат рака под рака, создавајќи производи и услуги што не само што се премиум, туку и ги редефинираат стандардите на индустриите, па едвај чекам да ѝ ги претставиме на јавноста“, вели нашата соговорничка.

Сања Митровска, основачка на платформата „Нетворкер“ и креаторка на шоуто Фото: Лична архива

 

Истите вклучуваат иновативни материјали како вештачка кожа и паметни модни додатоци, решенија кои комбинираат напредна технологија и екологија за да создадат уникатни искуства за сопствениците на јахти, луксузни IoT решенија кои го оптимизираат животниот простор и овозможуваат ново ниво на ефикасност и удобност во домовите, како и премиум услуги со вештачка интелигенција, како што се персонализирани консултации или ексклузивни дигитални решенија за клиенти со длабок џеб.

Менторство од експерти до кои тешко се стигнува 

Митровска објаснува дека и овојпат изборот на стартапи се вршел преку детален процес на селекција, каде што внимателно ги разгледувале потенцијалот за иновација, валидноста на идејата и способноста на тимот да ја реализира својата визија. Еден од критериумите за учество беше освен иновативна идеја која може да се примени на глобалните пазари да се приложи и готов прототип, производ или услуга што може да се демонстрира.

И во новата сезона преку серија на конструктивен фидбек, менторски сесии и презентации, стартапите ќе се натпреваруваат за шанса да го претстават својот бизнис пред водечки инвеститори и да добијат капитал за раст. За најдобрите ќе одлучува интернационално жири. 

„Нашето шоу дефинитивно ќе го промени начинот на кој се восприемаат стартапите во регионот. 'Фаундер гејмс' не е само натпревар, туку и платформа што овозможува регионалните иновации да се покажат на глобално ниво, обезбедувајќи им на претприемачите менторство од светски експерти кои не се лесно достапни. Нашата мрежа на инвеститори и партнери може сериозно да ги унапреди нивните проекти и да ги доведе до реална примена“, вели Митровска.

Според неа, победничкиот стартап од првата сезона, „Биохајд“ (BioHide), е најдобар доказ дека нашите локални идеи можат да достигнат глобално ниво. Митровска нагласува дека на македонските студентки кои создадоа биокожа од комбуха им овозможиле да работат со истражувачки центри на Стенфорд и Минерва каде што пристапиле до научни ресурси клучни за производот, но и разговори со потенцијални партнери и инвеститори.

„Тие се пример како идеја може да премине од локален потенцијал во глобална реалност и истражувачка работа“, завршува Митровска.