Жителите на Флорида се навикнати да чекаат да помине невремето. Поддржувачите на претседателот Доналд Трамп во Палм Бич се обидуваат да сфатат дали бурата околу неговите царини е само уште еден минлив облак.
Оние што живеат на богатиот остров во Јужна Флорида велат дека е премногу рано да се каже дали царините за „Денот на ослободувањето“, кои беа многу поагресивни отколку што очекуваа многу инвеститори, ќе претставуваат смело преуредување за глобалната економија - или ќе се покажат како чисто лудило.
Над пет трилиони долари пазарна вредност беа избришани од американската берза минатата недела откако Трамп го обелодени планот. Сега се зборува за рецесија, а милијардерите на хеџ-фондовите, вклучувајќи го и поддржувачот на Трамп, Бил Акман, предупредија на „економска нуклеарна зима“ доколку продолжи трговската војна.
На забавата во замокот на милијардерот Џон Полсон во Палм Бич во саботата вечер некои гости беа уверени дека плановите на Трамп ќе успеат, додека други изразија загриженост, според двајца присутни што побараа да останат анонимни поради приватноста.
Гостите се согласија дека целта на Трамп да создаде повеќе работни места во САД е за пофалба, но некои стравуваа дека неговите методи преку царини се премногу груби. Полсон пред една година организира раскошен собир за собирање средства за Трамп.
Десетици милијардери имаат дом во Палм Бич, каде што ресортот на Трамп, Мар-а-Лаго (Mar-a-Lago), стана еден вид Бела куќа на Флорида. Жителите на ова богато подрачје, преполно со домови во тудорски и шпански стил, можат да си дозволат да ги издржат флуктуациите на пазарот и зголемувањето на цените што би можеле да произлезат од трговските бариери, велат локалните претприемачи.
„Ако изгубат сто милиони, мислите ли дека тоа ќе направи разлика за нив? Не, тие играат на долги патеки“, рече Џорџ Шарубим (74), сопственик на „Џорџос“ (Giorgio's), кројачка продавница за кожа, која облекува многу милијардери во Палм Бич, вклучувајќи го и претседателот Трамп.
„Џорџос“ увезува сѐ што продава, од разнобојни чанти од кожа од ној до луксузни костуми од кашмир. Шарубим, кој носеше златни белезици „картие“ (Cartier), рече дека не е загрижен за дополнителните трошоци бидејќи неговите клиенти се богати.
Во текот на викендот Палм Бич однадвор изгледаше мирно. Претседателот е во Мар-а-Лаго од четвртокот, играше голф и ги забавуваше гостите на настан за собирање средства. Еден пар од Њујорк, кој сакаше да остане анонимен, рече дека во саботата вечерале во клубот, каде што затекнале „весела, жива и забавна атмосфера“. Трамп пуштал музика од своето биро и танцувал на песната YMCA од „Вилиџ пипл“.
Милијардерот инвеститор Вилбур Рос, поранешен министер за трговија на Трамп, во едно интервју рече дека во петокот вечер присуствувал на забавата на островот за 80-от роденден на пријател и дека разговорите не се разликувале многу од која било друга вечер.
„Крахот на пазарите и царините беа голема тема - секој во Палм Бич има свои портфолија - но тоа не ја намали забавата“, рече Рос, додавајќи дека луѓето зборувале, меѓу другото, и за голф и тенис.
Палм Бич, кој има околу 9.000 постојани жители, изгледа тивко дури и додека претседателот е во градот, а многу училишта се на пролетен распуст. По должината авенијата Ворт, каде што има изобилство палми, жени во ленени фустани и мажи во поло-маици и лесни панталони минуваа покрај луксузните бутици, чии врати испуштаа освежувачки воздух со мирис на јасмин и сандалово дрво.
Тишината повремено ја кршеше звукот на моторите на странските спортски автомобили - кои може да поскапат за илјадници долари поради царините на Трамп.
Реј Рачуба, изведувач на градежни работи, кој е во посета на својата мајка во Мериленд и често седи на клупа во близината на плажата, рече дека претрпел загуба во своето портфолио. Тој е загрижен и за имиграциските ограничувања што го отежнуваат наоѓањето градежни работници, но тој му дава шанса на Трамп во однос на тарифното прашање.
„Се плашам дека јавноста ќе се сврти против Трамп пред царините да имаат шанса да успеат“, рече тој.
Но не сите во Палм Бич го поздравија фокусот на претседателот кон протекционизам. Сара Јонг, пиар-специјалистка за луксузен маркетинг, која стоеше во сенка под натстрешницата на една продавница, рече дека царините не се добро осмислени.
„На крајот, американскиот народ ќе ги плати последиците, какви и да се тие“, рече Јонг.
Лери Лидс, жител на Палм Бич, раководеше со еден од најголемите американски производители на облека во текот на 1970-тите и 1980-тите години и беше сведок на движењето на производство во странство. Неговата компанија „Менхетн индустрис“ (Manhattan Industries) имаше фабрики во Њу Џерси, Јужна Каролина, Њујорк, Северна Каролина и Џорџија.
„Идејата дека воведувањето царини за облека и обувки може да доведе до зголемено производство дома е глупост“, рече Лидс, регистриран републиканец што гласаше за Трамп. „Ќе бидат потребни години да се изградат фабрики и да се обучуваат луѓе, нема економска смисла со оглед на јазот во платите. Тоа би предизвикало неверојатна инфлација.
Иако Флорида станува сè повеќе „црвена“, Палм Бич сè уште е дел од областа што гласаше за Камала Харис на изборите, а знаците на незадоволство меѓу демократите беа видливи.
Од спротива, во многу поскромна урбана област на копното, околу илјада луѓе се собраа во саботата на протестот „Рацете долу!“ (Hands Off“) против Трамп, еден од многуте такви протести низ САД.
Демонстрантите стоеја по должината на улицата, мавтајќи со транспаренти. Човек што возел „тесла“ (Tesla) свирнал, го спуштил прозорецот и ѝ покажал среден прст на толпата.
Тери Хејл, филмски монтажер од Балтимор, кој има дом во Јупитер Фармс, место во округот Палм Бич, учествуваше на протестот. Хејл рече дека неговото лично богатство е намалено поради реакцијата од пазарите на царинските планови на Трамп.
„Јас сум многу песимистичен“, рече тој. „Не само поради економската состојба туку и поради целата омраза и одмазда што се случуваат во нашата земја“.
.webp){kind=icon}
