Климатските промени влијаат на нашето однесување на социјалните мрежи. На многу лош начин. Бројот на лути коментари вртоглаво расте кога температурата ќе надмине 30 степени целзиусови, покажа истражувањето на Институтот за истражување на последиците од климатските промени во Потсдам.
„Ова е показател за тоа колку добро луѓето се способни да се прилагодат на високите температури“, рече Аника Стечемесер, автор на студијата објавена во научното списание Lancet Planetary Health претходно овој месец.
„Ако температурите се премногу ниски или превисоки, говорот на омраза почесто се појавува на интернет, без оглед на другите социјални, економски, политички или верски разлики“, додаде таа.
Глобалното затоплување од околу 1,1 степени во споредба со прединдустриското време доведе до серија екстремни временски настани ширум светот. Ова лето суша и серија топлотни бранови ги погодија Европа, Кина и САД. Топлината е поврзана со психијатриска нега, повисока стапка на самоубиства и зголемена стапка на семејно насилство, според студијата.
Агресивното однесување на интернет е поврзано и со насилството во секојдневниот живот. Запалливите постови доведоа до зголемување на насилните дејствија против припадниците на малцинствата, вклучувајќи масовни убиства, линчови и етничко чистење, според Советот за меѓународни односи, со седиште во Њујорк.
Стечемесер и другите истражувачи анализираа примерок од четири милијарди твитови објавени помеѓу 2014 и 2020 година во САД. Користејќи ја вештачката интелигенција и дефиницијата на Обединетите нации, тие издвоија 75 милиони објави кои содржат говор на омраза, расна дискриминација, мизогинија и хомофобија. После тоа го споредија времето на постовите со температурните услови.
Истражувачите дошле до заклучок дека говорот на омраза се интензивира кога дневните максимални температури надминуваат 21 целзиусов степен, што уште се нарекува и точка „добро чувство“, односно температурата каде што повеќето луѓе се чувствуваат удобно. Во топлите денови бројот на коментари со говор на омраза е зголемен за 22 отсто во однос на периодот со умерени температури. Без разлика на климатските зони и припадноста на социјална група, тензиите на интернет дополнително се зголемуваат кога температурата ќе надмине 30 степени. Истражувачите исто така укажуваат дека фреквенцијата на лути коментари се зголемува за 24 отсто кога температурата е помеѓу 42 и 45 степени целзиусови во американските држави кои се карактеризираат со топла и сува клима како Тексас, Аризона, Ново Мексико и Калифорнија.
Минатата година, истите истражувачи дојдоа до слични заклучоци кога ја проучуваа Европа. „Кога зборуваме за климатските промени, треба да запомниме дека ефектите се чувствуваат насекаде, не само на места погодени од неволји од поголеми размери“, рече Стечемесер. „Има места каде што не се детално анализирани социјалните последици од топлотните бранови, особено не од гледна точка на соживот во иднина“.
Истражувачите ги анализираа твитовите како целина и не навлегоа во специфики поврзани со објавите. Ова значи дека не постои начин да се знае дали времето одигра улога во зголемувањето на тензиите на интернет по убиството на Џорџ Флојд во мај 2020 година или пред нападот на Капитол Хил во јануари 2021 година. Сепак, можно е да се дојде до некои заклучоци кои би можеле да бидат корисни пред прелиминарните избори на 8 ноември.
„Нашите резултати покажуваат дека ако септември е невообичаено топол, можеме да очекуваме повеќе говор на омраза на Твитер“, рече Стечемесер. „Меѓутоа, истражувањето не покажува за каква омраза станува збор, ниту со какви теми се занимаваат објавите. Сè уште не знаеме дали говорот на омраза е поврзан со политички теми“.
Директна врска помеѓу топлотните бранови и говорот на омраза на интернет беше забележана и во Кина, каде што истражувачите анализираа над 400 милиони објави од 43 милиони кориснички сметки на најголемата социјална мрежа за кратки објави, Sine Weibo. Нивните резултати укажуваат дека деновите со температури над 35 степени, дожд, ветер, како и облачни денови и денови кога загадувањето е високо, ги прават корисниците на интернет посклони кон иритација.
„Се разбира, луѓето можат да одлучат на свесно ниво дали ќе бидат љубезни или не, но сепак ќе се однесувате пораздразливо ако сте во одреден температурен опсег“, рече Стечемесер. „Прво треба да го ограничиме глобалното затоплување, очигледно тоа е најдобриот пристап“.
.webp){kind=icon}
