.webp){kind=icon}
Италија, која ја красат убавините на антиката и ренесансата, како и модната индустрија и голем број луксузни туристички дестинации, е сè попопуларна меѓу доларските милионери што се преселуваат во Европа, покажуваат податоците на компанијата „Хенли енд партнерс“ (Henley & Partners), и тоа додека се очекува оваа година бројот на милионери што се преселиле од една во друга земја за првпат да ги надмине бројките од претпандемиската 2019 година.
Растот на популарноста на Италија не е изненадувачки со оглед на тоа што оваа земја веќе има развиена инфраструктура, како и многу монденски места, како езерото Комо, брегот на Амалфи и сѐ попопуларната Сицилија, на која многумина побрзаа веднаш по претставувањето на луксузниот живот на овој италијански остров во серијата „Белиот лотос“ (The White Lotus) на „Нетфликс“, чиј фокус е луксузен хотел.
Bloomberg
Меѓутоа, покрај традиционално привлечните причини - како што е тоа Џорџ и Амал Клуни да ви бидат соседи - има уште неколку причини поради кои Италија е сè попопуларна меѓу доларските милионери што сакаат да живеат во Европа: даноците и промените на законите во другите земји во Европа. Имено, во првите четири месеци од оваа година бројот на барања за преселување во Италија е зголемен за 77 отсто во однос на бројот за целата 2022 година, истакнуваат од компанијата „Хенли енд партнерс“
„Иако тоа може да му се припише на потенцијалното затворање на програмите во Португалија и Шпанија, Италија е атрактивна опција бидејќи, иако не постои услов за носителите на дозволи да поминат каков било минимален број денови во земјата, оние што ќе одлучат да ја направат Италија свое даночно живеалиште може да плаќаат годишен паушален износ од 100.000 евра за кој било приход од странство под режимот на паушалниот данок“, вели Стјуарт Вејклинг, партнер и извршен директор на компанијата „Хенли енд партнерс“.
Bloomberg
Португалија планира да ја укине т.н. „златната виза“, која им овозможува на граѓаните од земјите надвор од Европската Унија да инвестираат минимум 280.000 евра во недвижности за да имаат право да живеат, работат и студираат во таа земја. Покрај тоа, се зборува дека Шпанија ќе ги промени условите во рамките на својата политика за добивање виза, додека Грција најави дека условот за вредноста на имотот на чија основа се добива престој ќе го зголеми на 500.000 долари во некои делови од земјата (делови од Атина и Солун, како и престижните острови Миконос и Санторини).
Во 2023 година се очекува дека околу 122.000 милионери ќе одлучат да се иселат од земјата на нивниот сегашен престој, а тој број би требало да се зголеми на 128.000 во 2024 година. Двата броја ја надминуваат бројката од 110.000 од 2019 година.
Австралија останува најпопуларна дестинација за светските милионери
Bloomberg
На светско ниво, Австралија продолжува да предничи како земја за која се очекува дека ќе прими најмногу милионери мигранти во 2023 година. Се очекува оваа година во Австралија да одат 5.200 милионери, наспроти 3.800 милионери минатата година. На второ место во светот се Обединетите Арапски Емирати, а потоа следуваат Сингапур и САД. Од европските земји најмногу милионери се очекуваат во Швајцарија и Грција, но Швајцарија бележи пад во однос на 2022 година, додека растот во Грција е 20 отсто.
Од „Хенли енд партнерс“ истакнуваат дека австралиската визна политика, која се заснова на систем на бодови, во голема мера е заслужна за нејзината привлечност меѓу богатите, но нагласуваат дека голема улога може да играат климата, плажите, малиот број жители по квадратен километар, безбедноста, здравството и многу други фактори. Од друга страна, ОАЕ се познати како мирно засолниште на Блискиот Исток, со разновидна економија, ниски даноци, меѓународни училишта и луксузни недвижности, а притоа се и познат центар за луксузен шопинг и кулинарска сцена.
Bloomberg
Кога ги набљудуваме земјите од кои се селат милионерите, Кина продолжува да води и оваа година, бидејќи ќе ја напуштат 25 отсто повеќе милионери од минатата година, вкупно 13.500, како што проценуваат од „Хенли енд партнерс“. Како што истакнуваат од оваа компанија, геополитиката сè уште игра голема улога во одлуките на милионерите да се селат, бидејќи тие постојано бараат безбедни засолништа за своите пари.
И покрај тоа, податоците покажуваат дека за разлика од минатата година, кога 8.500 руски милионери ја напуштиле својата земја, оваа година ќе си одат само 3.000 милионери (што исто така навестува дека многумина си заминале). Сепак, Велика Британија (и делумно САД) не може да се пофалат со голем број новодојдени милионери, бидејќи најбогатите сѐ повеќе ги гледаат како недоволно стабилни во однос на безбедноста, политиката и економијата.
Што се однесува до Кина, пишува Ендрју Амоилс, директор за истражување во компанијата „Њу ворлд хелт“ (New World Health), милионери од таа земја заминуваат веќе со години, а особено голем удар беше забраната за 5Г-мрежата на компанијата „Хуавеј“ во САД, Велика Британија и Австралија. „Целокупниот план на Кина да се оддалечи од статусот производител на компоненти и да премине на готови производи е исто така оштетен од оваа забрана“, додаде Амоилс.
