Беше само прашање на време кога „тивкиот луксуз“ ќе го освои светот на патувањето. Одразувајќи ја шик-тенденцијата кон ненападност и софистицираност, трендот е забележлив речиси насекаде: од модата до мебелот, од спортските автомобили до негата на кожата.
Запознајте го тајното сместување, кое може да го резервираат само оние што знаат дека постои. Не само што се избегнува вообичаениот систем за онлајн резервации туку и нивното постоење практично се крие од јавноста. Овие сместувачки единици се избришани од хотелските веб-страници и не постојат во резултатите од пребарувањето - тие се речиси како фантоми во светот на луксузното сместување, кое инаку е многу видливо насекаде и особено присутно на Инстаграм.
Цените се достапни само по пат на директно барање и мора да пребарувате навистина темелно за да видите фотографија, па дури и опис, во кој било јавно објавен формат. Во изминатата година се појавија десетици такви сместувачки единици.
Запознајте ја Вила де Франс, нов петсобен стан во „Шевал блан“ на островот Свети Вартоломеј дизајниран од Жак Гранж. Тоа е луксузно прибежиште толку дискретно сместено во флората на одморалиштето што е речиси невозможно да се забележи во реалниот живот. Исто така, речиси е невозможно да се пронајде на интернет. Ако доволно внимателно ја прегледате страницата за сместување на хотелот, можете да наидете на неколку детали што го потврдуваат неговото постоење, вклучувајќи и спомнување на приватен спа-центар во самата вила и два базена, но потенцијалните гости не можат да најдат ни навестување како да го резервираат тоа.
За оние што се доволно снаодливи да се јават или да испратат имејл директно во хотелот (+590-590-27-5666), постои можност да си ја пробаат среќата со еден од амбасадорите за резервации во „Шевал блан“. По процесот на проверка, кој е речиси како купување чанти „биркин“ што ги нема на списокот на „Хермес“, овие претставници ќе одредат дали е достапна Вила де Франс за 30.000 евра по ноќ.
Вила де Франс, нова петсобна сместувачка единица дизајнирана од Жак Гранж во хотелот „Шевал блан“ на островот Свети Вартоломеј. Извор: Шевал блан/Cheval Blanc
Генералната менаџерка на „Шевал блан“ на Свети Вартоломеј, Кристел Хилпрон, ја потврдува причината за тајноста: „Целосна приватност“, вели таа. Со кујна како за врвен готвач, трпезарија за 10 лица, приватен спа-центар и фитнес-центар, како и директен пристап до плажата Фламандс, вилата овозможува целосно избегнување интеракција со другите гости од одморалиштето. „Тоа исто така ни овозможува целосно да ги разбереме нивните потреби, желби и очекувања“, додава Хилпрон.
Другите сместувачки единици се уште потаинствени.
„Њут“ во Сомерсет, во местото Брутон, Англија, е дом на префинета колекција на соби и апартмани исполнети со грузиски антиквитети, камини што потпукнуваат и преголеми кади. Ниту една не е толку приватна како „Гејт лоџ“, двособна куќичка што минатата година тивко беше додадена на имотот од 400 хектари.
„Гејт лоџ“ во Њут, оддалечен на два часа возење од Лондон, во Сомерсет. Извор: Њут во Сомерсет/The Newt in Somerset
Вилата има многу дополнителни погодности - отворена кујна, количка за голф за секој гостин и велосипеди - но нејзиниот таинствен статус е она што ги привлекува познавачите. Оваа сместувачка единица од 2.600 долари за ноќ не постои на веб-страницата на хотелот и може да се резервира само со директно јавување на линијата за резервации на „Њут“.
Според Џек Езон, основач на туристичката бутик-агенција „Ембарк бијонд“, овие сместувања за кои се шушка го носат со себе истиот престиж како и необјавените телефонски броеви од 1990-тите. Тие се дури уште попримамливи од резервациите за вечера што се тешкодостапни или клубовите во кои на може да се влезе, имајќи предвид дека овие скривалишта се практично непознати.
Во свет каде што сè се фотографира, објавува и споделува на социјалните мрежи, има нешто сосема неодоливо во тоа да се биде незабележлив, дури и ако не сте позната личност што се крие од папараците.
„Сè повеќе клиенти сакаат нешто недостапно“, вели Езон, додавајќи дека многу од неговите богати клиенти повеќе се загрижени за приватноста и личната безбедност отколку за тоа „да одат на место што веќе не го преплавило Инстаграм - место за кое никој не слушнал ниту имал пристап“.
„Бродмур“ во Колорадо Спрингс чува тајно сместување, кое е како ресорт во ресортот. Тоа е дел од малку познатиот „Клауд-камп“ (Cloud Camp), повеќе соби и апартмани на врвот на планината на околу 20 минути возење од главната зграда на „Бродмур“ . Скриениот сеопфатен „Фајр тауер суит“ (Fire Tower Suite) е двокатна кабина со една спална соба, сместена во поранешна противпожарна кула, со приватно џакузи меѓу врвовите на дрвјата. Цените започнуваат од 1.167 американски долари за ноќ и може да се резервираат само со повик (800) 634-7711.
The Broadmore
Трендот на тајни апартмани се прошири и надвор од копното: вратата означена со „само за персонал“ на бродот „Винд сурф“ (Wind Surf) на „Виндстар“ (Windstar) води до скриен „офисерс суит“ (Officer's Suite), со една спална соба, единственото сместување на капетанската палуба. Цените варираат во зависност од маршрутата, а резервациите можат да се направат само со повик на бројот (855) 706-5766.
За компанијата „Бушкамп“ (Bushcamp Co.), која организира луксузни сафари-тури во Замбија, одржувањето на сместувањето подалеку од јавноста беше помалку за создавање чувство на луксуз, а повеќе за бета-тестирање нова идеја, вели основачот Енди Хог. Минатата година тој одлучи да обнови два големи контејнери што претходно служеа за транспорт на мебел и да ги трансформира со големи прозорци, пространи бањи и пространа дневна соба.
Сега поранешните индустриски контејнери се всушност приватни домови на влезот во националниот парк Јужна Луангва. Секој од нив е опремен со приватна кујна, трпезарија на отворено и сместување за најмногу четири гости, обезбедувајќи пофлексибилно и приватно сафари-искуство во споредба со строгото и често преполно искуство на кампување.
Хог додава дека криењето на сместувањето од јавноста му овозможува на неговиот тим постојано да ја „рафинира понудата, да тестира како гостите го користат просторот и да продолжат да иновираат“. (Испратете е-пошта за да се распрашате за резервацијата овде.)
Криењето не е секогаш најдобрата стратегија, како што докажаа мандаринскиот „Ориентал Њујорк“ минатата година, кога нивниот долго чуван таен апартман (Suite 5.000) одеднаш се појави на веб-страницата на хотелот. Бројот на резервации е зголемен за 31 отсто во однос на 2019 година.
Сепак, според Даниеле Чои, директорка за маркетинг и продажба, поголемиот дел резервации за апартмани сè уште доаѓаат преку директен контакт, наместо преку веб-страницата. „Во ретки случаи, кога ќе се направи онлајн резервација, нашиот тим за односи со гости веднаш стапува во контакт за да го приспособи нивниот престој“, додава таа.
Личниот однос е токму она што ја инспирира Аманда Заслоу, косопственичка на хотелот „Вила ет Саџертис“ (Villa at Saugerties) во долината Хадсон во државата Њујорк, да ги направи повеќето нивни хотели практично невидливи на интернет. Ниту една од собите не може да се резервира без повик или мејл; всушност, онлајн презентацијата на хотелот е само страница со информации за контакт на дното.
Посебно таинствено искуство/Villa at Saugerties
„Луѓето понекогаш се јавуваат и велат: Дали знаете дека вашата страница е неисправна?“, вели Заслоу низ смеа. „Им велам: Всушност, работи токму онака како што треба“.
Мотивите, од друга страна, помалку се поврзани со тивкиот луксуз или ексклузивноста, а повеќе со понуда на посебно искуство, без разлика дали станува збор за обезбедување на саканото освежување или изненадување со омиленото шише вино - гест што може да се изведе само преку однос еден на еден со гостинот.
„Многу гости сметаат дека е навистина одлично што треба да поминат повеќе километри за да нè најдат“, вели таа, „но тоа ни дава и можност да создадеме уникатен престој за секој човек што ќе помине низ нашите врати“.
.webp){kind=icon}
