Во Скопје и во регионот нема откажани летови, но блокадите низ аеродромите почнаа

По американските воздушни напади врз цели во Иран и сè почестите инциденти со блокирање на ГПС-сигналот и случаи со лажирање на локацијата, многу од светските авиокомпании продолжуваат да ги суспендираат летовите до и од регионот на Блискиот Исток, нарушувајќи го меѓународниот сообраќај и оставајќи илјадници патници блокирани низ Европа, Азија и Персискиот Залив. Во регионот Адрија за време на викендот немаше откажани летови до и од Дубаи, а летовите редовно се одвиваа на директните линии на „Флај Дубаи“ до и од Белград, Сараево и Љубљана, со некои доцнења - до 30 минути. Сепак, што треба да знаете ако планирате лет деновиве?

 

Дубаи е најпрометниот меѓународен аеродром

За оние што планирале патување до егзотични дестинации со застанување во Дубаи или Доха, новата ситуација претставува сериозен предизвик. Двете главни воздушни точки на Блискиот Исток - Дубаи, седиштето на компанијата „Емирати“, и Доха, матичното пристаниште на „Катар ервејс“, се клучни центри за сообраќај на долги релации. Благодарение на нивната стратешка позиција, овие дестинации овозможуваат поврзување на летови помеѓу САД, Европа и Азија. Особено по затворањето на рускиот воздушен простор за многу западни авиокомпании, како и реципроцитетот од страна на Русија, многу летови помеѓу Европа, Азија и САД беа насочени преку Блискиот Исток. Дубаи стана најпрометниот меѓународен аеродром во светот.

 

Дубаи е седиште на авиокомпанијата „Емирати“. Фото.: Блумберг

Но, по американскиот напад врз Иран, меѓународни компании како што се „Луфтханза“, „Бритиш ервејс“, „Ер Франс-КЛМ“, „Сингапур ерлајнс“, „Американ Делта“ и „Јунајтед“ беа принудени да ги пренасочат рутите над Блискиот Исток. Многу летови сега се пренасочуваат на север преку Касписко Море или на југ преку Египет и Саудиска Арабија - рути што ги зголемуваат времето на летот, трошоците за гориво и потребите од екипаж.

Повеќето компании засега ги откажаа летовите до Дубаи и Доха. „Ер Франс КЛМ“ откажа неколку лета до Дубаи и Ријад, наведувајќи ги како причина растечките безбедносни ризици.

Британските „Бритиш ервејс“ и „Сингапур ерлајнс“ ги откажаа летовите до дестинации во Персискиот Залив откако американските напади ги погодија нуклеарните постројки на Иран, а Техеран се закани со одмазда.

„Бритиш ервејс“ како причина ги наведе „оперативните ограничувања и ограничувањата во воздушниот простор“. Според Флајтрадар24, еден авион што полета од лондонскиот аеродром „Хитроу“ во саботата вечер мораше да се пренасочи кон Цирих откако влезе во саудискиот воздушен простор, додека другиот се врати во Лондон откако стигна до Египет.

Летовите до Доха беа суспендирани во неделата, додека линиите до Бахреин беа суспендирани до крајот на месецот. Авиокомпанијата соопшти дека го приспособила својот распоред за да „ја зачува безбедноста на патниците и екипажот“, објави „Блумберг“.

Сепак, како што објави денес „Ројтерс“, „Бритиш ервејс“ планира да ги обнови летовите од Лондон до Дубаи и до Доха, откако тие летови беа откажани за време на викендот.

Воздушниот сообраќај постепено се обновува и кон други дестинации, главно врз основа на привремени безбедносни процени.

Иако сите комерцијални летови се откажани од петокот, 13 јуни, израелските власти воведуваат итни летови за евакуација на граѓаните и на посетителите. Авиокомпанијата „Ел Ал“ наведе дека примила околу 25.000 барања од патници што сакаат да ја напуштат земјата само за време на викендот. Секој лет е ограничен на 50 патници. Покрај тоа, „Ел Ал“, во соработка со компанијата „Мано Меритајм“, организира патувања со брод помеѓу Израел и Кипар - едното од Израел за патници што сакаат да ја напуштат земјата, а другото од Кипар за патници што сакаат да се вратат во Израел. Секое патување може да прими околу 1.500 патници и е дополнителна опција покрај вонредните летови што ги управува „Ел Ал“. Летовите на „Ел Ал“ се затворени за нови резервации до 15 јули поради безбедносната ситуација, според веб-страницата на израелската авиокомпанија.

 

Во неделата од 14 до 20 часот по локално време беше отворен аеродромот „Бен Гурион“ во Тел Авив, и тоа за чартер-летови за британските државјани што сакаат да го напуштат Израел. Фото: Блумберг

„Сингапур ерлајнс“ во неделата откажа два лета меѓу Сингапур и Дубаи , предупредувајќи дека и другите летови на рутата би можеле да бидат засегнати „поради променетата безбедносна ситуација“.

„Џапан ерлајнс“ планира да ги пренасочи летовите меѓу Токио (Ханеда) и Доха за да го избегне воздушниот простор над Персискиот и Оманскиот Залив, што ќе го зголеми времетраењето на летот за околу 20 минути. „Ер Индија“ исто така објави дека во наредните денови постепено ќе избегнува одредени зони над регионот.

Хаос во воздушниот сообраќај

Дури и пред нападите на САД, неколку американски и европски авиокомпании веќе ги прекинаа летовите до Обединетите Арапски Емирати и Катар откако Израел започна со бомбардирање цели во Иран.

„Американ ерлајнс“ ги прекина дневните летови од Филаделфија до Доха откако американската амбасада во Катар минатиот четврток ги предупреди американските граѓани и сопствениот персонал да „употребуваат зголемена претпазливост“. Предупредувањето вклучува совети за избегнување собири, демонстрации и локации поврзани со SjAD, како и за „држење низок профил“, според соопштението објавено на веб-страницата на Стејт департментот во четвртокот.

Компанијата потврди дека последниот лет од Доха до Филаделфија бил реализиран рано во четвртокот, додека следните биле откажани до 22 јуни. Во четвртокот „Јунајтед ерлајнс“ ги прекина дневните летови помеѓу Њуарк (меѓународен аеродром „Њуарк Либерти“) и Дубаи, со порака дека сообраќајот ќе биде обновен „кога ќе биде безбедно да се стори тоа“.

Претходно месецов „Делта ерлајнс“ и „Јунајтед“ исто така ги прекинаа летовите од САД до Тел Авив.

 

Фото: Елизабет Ангел/Блумберг

 

Што е добро да знаете ако планирате да одите некаде? 

Зголемените геополитички ризици дополнително ја зголемуваат веројатноста за нови нарушувања во воздушниот сообраќај, во зависност од реакцијата на Техеран. Трамп се закани со нови напади доколку Иран не се откаже од своите закани.

На патниците им се препорачува да обрнат дополнително внимание на следново доколку планираат патување.

* Директно проверете го статусот на летот со авиокомпанијата - многу летови се откажуваат и се менуваат од час во час.

*Ако патувате службено или во транзит, следете апликации како Флајтрадар24 за ажурирања во реално време.

*На патниците им се препорачува да имаат флексибилни резервации и патничко осигурување за да ги покријат ненадејните политички кризи.

 

 

Во моментов нема коментари за веста. Биди прв да коментира...

Остави коментар