Викенд бегство на македонските планини за спас од летните жештини

Сте слушнале ли за „кулкејшн“ (coolcation), терминот што означува бегство од топлотните бранови и избор на постудени дестинации за одмор и релаксација? Овој нов тренд во туризмот кој им нуди алтернатива на патниците се’ повеќе добива на цена, а неодамна едно истражување во Германија покажа дека двајца од петмина испитаници планираат да ги променат своите навики за патување поради жештините во Јужна Европа.

За едни беше изненадување, но за други очекуван потег кога ладната Литванија лани постигна рекорден раст на туризмот. Посетата на странски гости во оваа европска земја се зголеми за шест отсто во однос на претходната година, а угледниот сајт за патувања „Лонли Планет“ ја прогласи како втора најдобра туристичка дестинација во светот.

И последниот извештај на „Сојерн“, една од водечките платформи за травел маркетинг, покажа дека се’ повеќе патници бараат планински оази, свежина, мир и бегство од неподносливо топлото време, а овие места како совршени дестинации во лето се’ почесто ги рекламираат и влијателните личности на социјалните мрежи. Кога Весна Коцевска се најде на листата со најдобри инфлуенсери за патувања во регионот специјално за „Блумберг Адрија“ направи листа со топ 5 македонски места за викенд-бегство, а на списокот доминираа токму локации каде што температурите се пониски.

Четврта година по ред една од најбараните авантури кај нас во лето е и планинскиот картинг. Ова уникатно возење на три тркала не е примамливо доживување само за туристите на кои очајно им фалат скијачките терени во јули и август, туку и за оние што поради екстремните горештини овие месеци од годината сè повеќе се одлучуваат барем неколку дена да поминат на планина наместо на плажа.

Значителен раст во рентањето на планински места вон сезона, особено од петок до недела, бележат и сопствениците на најголемата онлајн платформа кај нас која нуди алтернативно сместување.

„Покрај годишниот летен одмор кој најчесто го користат покрај море, се’ почесто луѓето одлучуваат слободните викенди од годината да ги поминат на македонските планини“, велат од „Кајак.мк“.

Во разговор за „Блумберг Адрија“ оттаму посочуваат дека особено барана во моментов е планината Голак.

Модерен објект на Голак/Извор: Кајак.мк

„Секоја година се отвораат нови уникатни планински вили и можеме да констатираме дека во овој регион развојот е највидлив“, истакнуваат од „Кајак.мк“.

Еден таков модерн објект овде со приватен базен, декориран и опремен во поголемиот дел со природни материјали, се нуди на надморска височина од 1380 метри и се наоѓа на околу 10 километри или 15-минутно возење од Делчево. Гостите имаат пофални зборови за тивката околина која, според нив, е идеална за мини-одмор и рекреација.

Уште една атрактивна вила во близината на Делчево се нуди како совршено бегство од жешкиот асфалт. Се наоѓа на околу 1020 метри надморска висина на планината Влаина, на повеќе од шест декари приватна површина опколена со доминантна букова шума.

Тераса со поглед на Влаина планина/Извор: Кајак.мк

Објектот располага со мал рибник и вир покрај кои може да уживате и да се капете. Во пошироката околина има густа мешовита шума погодна за пешачење, како и земјени патеки за велосипедизам.

На платформата расте интересот и за планинските вили во Бигла. Станува збор за село од разбиен тип на куќи кој се наоѓа на 700 метри надморска височина, во густа борова шума со лесно пристапен асфалтен пат.

Во овој дел на Македонија се наоѓа и селото Тработивиште кое туристите исто така често го посетуваат. Околината им овозможува на гостите да уживаат пешачејќи во стара борова шума низ која поминува рекреативна патека долга два километри. Во близина се наоѓа и единствената фарма за магариња во Македонија, на осум километри во селото Разловци.

Слични сместувања има и во другите краеви на земјава. Едно такво е сместено во село Герман, во близина на Крива Паланка, на надморска височина од 1400 метри. Станува збор за дрвена планинска куќичка опкружена со борова и букова шума која редовно добива високи оценки од гостите поради мирот што го нуди, свежиот воздух и пејзажите.

Како совршен спас од топлото време од „Кајак.мк“ ја издвојуваат и Баба Планина на чии падини се наоѓа и една од најскапите вили огласени на платформата. Се наоѓа во селото Нижеполе и чини 13.000 денари од ден. Слична таква планинска вила со простран базен има и во потпелистерското село Магарево и за неа ќе треба да одвоите 15.000 денари за едно ноќевање.

На платформата се достапни уште стотина сместувања во планински подрачја кои како никогаш порано се издаваат и во лето. За разлика од претходните години кога цените, главно, најмногу зависеа од годишното време, сега во голема мера се креираат според квалитетот на објектот и инвестицијата што е вложена.