Ако и натаму сте скептик во врска со употребата на вештачката интелигенција (ВИ), стигна уште еден аргумент „за“ прифаќање на новите можности што ги нуди ВИ. Академијата „Брејнстер“ (Brainster) ја промовираше новата алатка што работи со вештачка интелигенција, наречена „Умниверзум“, а која функционира како личен тутор по математика и е наменета за средношколците во Македонија. Туторот по математика ќе биде достапен 24 часа дневно, бесплатен е и примарно е создаден со цел да ги подобри знаењето, вештините и компетенциите по математика на средношколците во нашата држава.
„Проблемот што ќе се обидеме да го адресираме со ‘Умниверзум’ е лошиот перформанс по математика на нашите средношколци. А најдобар показател за овој проблем е меѓународното истражување PISA, кое ги оценува вештините на средношколците во математика, читање и природни науки, каде што Македонија во 2022 година се рангира на 61-то место во математика, 71-то во читање и на 68-то во природни науки од вкупно 81 земја. Овие резултати покажуваат дека нашите средношколци не се конкурентни споредено со нивните врсници од другите земји“, велат од „Брејнстер“.
Презентација на „Умниверзум“
Фото: „Брејнстер“
Алатката користи иновативен протокол, наречен „Умниверзум 1.0 Брејнстер интелигенција“ (umniverzum.com), а на своите корисници ќе им овозможи помош при подготовка за тестови, подобрувања на математичките вештини преку интерактивни задачи и натпревар, чекор по чекор објаснување на математичките проблеми и помош при решавање на домашните и училишните задачи по математика.
„Нашиот тим на студенти и професори од колеџот ‘Брејнстер некст’ (Brainster Next) и алумни студенти од академиите на ‘Брејнстер’ несебично ја изградија платформата ‘Умниверзум’ за сите средношколци во Македонија, со цел да се поттикнат младите да инвестираат време во изучување на математиката и да се зголеми љубовта кон математиката и нејзиното познавање, кое ќе им користи во понатамошното школување и во животот“, велат од академијата.
„Умниверзум“ не е единствениот новитет од „Брејнстер“
„Умниверзум“ е само еден од повеќето ВИ-проекти на кои се работи во академијата. На 2 јуни ќе биде лансиран нивниот следен ВИ-базиран софтвер, кој го развива помал професионален тим.
„Деталите засега ги чуваме во тајност, но станува збор за платформа со потенцијал да оствари сериозен глобален успех“, велат од „Брејнстер“.
„Покрај тоа, активно работиме и со студентите на развој на корисни ВИ-решенија. Еден од проектите, кој моментално е во фаза на примопредавање со Собранието на РСМ, е интелигентен интерактивен видеосистем со автоматска транскрипција и семантичка анализа, кој овозможува разговор со видеосодржини на македонски јазик“, велат оттаму.
Освен тоа, во рамките на дипломските работи студентите на „Брејнстер“ развиваат уште 11 алатки – од ВИ-бот за интеракција со релациски бази на податоци до парсер за неструктурирани документи и фитнес-тракери базирани на ВИ.
„Да сумираме, комбинирајќи интерна експертиза со студентска креативност, летово нè очекува вистинска ВИ-офанзива во која ќе лансираме помеѓу 10 и 15 нови ВИ-решенија“, велат од „Брејнстер“.
ВИ е во фокусот на академиите на „Брејнстер“
Од „Брејнстер“ велат дека сите нивни академии од тековната 2025 година во наставните програми вклучуваат изучување ВИ-технологија во две генерални примени. Едната преку специјализирана ВИ-обука за секоја област (ВИ во дигитален маркетинг, ВИ во графички дизајн, ВИ во UX/UI, ВИ во аналитика на податоци, како и ВИ во HR и проектен и продукт-менаџмент). Додека другата ги учи учениците на практична примена на ВИ-алатки за подобрување на личната продуктивност и конкурентност, како и полесна транзиција кон иднината со ВИ.
„Обуката за ВИ се спроведува преку самата програма на секоја од академиите, како и преку пакетот на ‘Брејнстер+’ курсеви за самостојно учење. Дополнително, нашата понуда на обуки при академиите ќе се збогати со две целосно нови програми, и тоа ‘Програмирање со ВИ’ и ‘Примената вештачка интелигенција’. И двете имаат цел да обучат кадар на идни ВИ-специјалисти и имплементатори на ВИ-решенија, односно градиме кадар што ќе биде носител на промените на новото време, кое веќе започна“, велат од „Брејнстер“.
Огромен интерес за изучување и примена на ВИ
Интерните податоци на академијата покажуваат дека интересот за изучување и примена на вештачка интелигенција во секојдневието е поголем од кога било досега.
„Последните две години, по појавата на ЧетГПТ (ChatGPT), а потоа и другите ВИ-алатки што следуваа, луѓето од различни професии почнаа активно да истражуваат како може да им помогне ВИ – било да е тоа за автоматизација на задачи, креирање содржини, анализи или лична продуктивност. Кај младите, особено кај средношколците и студентите, гледаме огромен интерес не само да ги користат овие алатки туку и да научат како функционираат тие, како се програмираат и како самите да создаваат ВИ-решенија“, велат од „Брејнстер“.
Оттука и потребата за инвестиции за лансирање нови академии за вештачка интелигенција, како и за првиот ВИ-тутор за математика – „Умниверзум“.
„Имаме уште неколку ВИ-алатки што се во фаза на развој и тестирање. Целта ни е да им ја доближиме ВИ на луѓето на практичен начин – без страв, без технички бариери и со фокус на нејзината реална примена во образованието, бизнисот и секојдневниот живот“, велат од „Брејнстер“.
.webp){kind=icon}
