ЏП Морган (JPMorgan Chase & Co.) ја ограничи употребата на четботот ЧетГПТ (ChatGPT) од страна на својот персонал, според извор запознаен со ова прашање.
Софтверот за вештачка интелигенција во моментот е ограничен, посочува лицето, кое побарало да не биде идентификувано бидејќи станува збор за приватни информации. Потегот, кој влијае на вработените во фирмата, не бил предизвикан од некој специфичен инцидент, туку одразува нормални контроли поврзани со софтвер од трета страна.
ЧетГПТ стана интернет-феномен во последните месеци. Брзорастечката технологија генерира текст, слики и други содржини како одговор на кратко барање внесено од корисниците.
Тоа поттикна многу шпекулации за неговиот иден потенцијал, од пишување песни во стилот на Шекспир до создавање инвестициски портфолија. Во врска со овој концепт е планиран дури и фонд со кој се тргува.
Корпорацијата „Мајкрософт“ инвестира 10 милијарди долари во „Опен еј-ај“ (OpenAI), истражувачката компанија за вештачка интелигенција што стои зад четботот, потег што би можел да ја доведе во прашање доминацијата на „Гугл“ (Google) во сферата на веб-пребарувањето.
Но, од лансирањето на ЧетГПТ во ноември се појавија некои проблеми. „Опен еј-ај“ посочи дека работи на намалување на грешките во системот и ќе им овозможи на корисниците да го приспособат неговото однесување по низата извештаи за несоодветни интеракции и проблеми со неговите резултати.
За заемодавците што цврсто се држат до регулативата, разбирлива е претпазливоста околу воведувањето на која било нова технологија. Во текот на 2021 и 2022 година американските регулатори им изрекоа вкупни казни од повеќе од две милијарди долари на десетина банки поврзани со неовластеното користење на услугите за приватни пораки од страна на нивниот кадар.
Претставник за „Опен еј-ај“ не одговори веднаш на барањето за коментар. „Телеграф“ претходно исто така објави за ограничувањата.
.webp){kind=icon}