„Гугл“ соопшти дека ќе избрише милиони записи од активностите за пребарување на корисниците како дел од спогодбата во однос на колективна тужба во која се тврдеше дека компанијата ги следи луѓето без нивно знаење.
Случајот, поведен во 2020 година, тврди дека единицата на „Алфабет“ (Alphabet Inc.) тајно собирала податоци од луѓе што го користеле нејзиниот популарен веб-прелистувач Хром (Chrome) во приватен режим на пребарување познат како „инкогнито“. Иако таа функција им овозможува на корисниците да го исклучат собирањето податоци кога го користат прелистувачот Хром, други алатки на Гугл што ги користат веб-страниците, како што е технологијата за рекламирање, и натаму ги собирале нивните податоци, беше наведено во тужбата.
„Гугл“, кој се согласи на договор во декември, ќе избрише „милијарди“ записи со податоци собрани при приватно пребарување од страна на корисниците, според деталите што беа објавени во понеделникот во Федералниот суд во Сан Франциско. Од „Гугл“ исто така соопштија дека направиле неколку промени во своите објави во кои се појаснува како се собираат податоци од луѓето, како и кои активности се видлива за веб-страниците кога корисниците прелистуваат во инкогнито режим. Компанијата исто така се согласи во следните пет години да им дозволи на корисниците во инкогнито режим да блокираат колачиња од трети страни.
„Задоволни сме што ја решивме оваа тужба, за која отсекогаш верувавме дека е неоснована“, посочи во изјава Хозе Кастанеда, портпарол на „Гугл“, во изјавата. „Никогаш не ги поврзуваме податоците со корисниците кога користат инкогнито режим. Среќни сме што ги бришеме старите технички податоци што никогаш не биле поврзани со поединец и никогаш не биле користени за каква било форма на персонализација“.
Додека тужителите побараа отштета од пет милијарди долари, спогодбата не вклучува плаќање од страна на „Гугл“. Наместо тоа, поединците ќе можат да бараат отштета со поднесување сопствени жалби против „Гугл“ пред државните судови на САД, според судските документи. Околу 50 луѓе веќе го сториле тоа, рекоа адвокатите на тужителите.
Адвокатите на тужителите, предводени од адвокатот Дејвид Бојс, ја нарекоа спогодбата „револуционерна“ и „историски чекор“ во барањето од големите технолошки компании да бидат транспарентни за корисниците за тоа како ги собираат и користат нивните податоци. Договорот на „Гугл“ за ретроактивно бришење на корисничките информации е значајна отстапка бидејќи го засега најпрофитабилниот рекламен бизнис на компанијата, што зависи од квалитетот на неговиот пребарувач. Сeто ова се случува додека компанијата ја мачат повеќе регулаторни предизвици во САД и во странство, во услови на зголемена загриженост за тоа како технолошките гиганти ги користат огромните количества на податоци што ги собираат од корисниците.
.webp){kind=icon}