Русија ќе потроши 646 милиони долари за блокирање на VPN

Рускиот регулатор на комуникациите „Роскомнадзор“ (Roskomnadzor) планира да потроши 59 милијарди рубли (644 милиони долари) во следните пет години за да ги надгради своите можности за филтрирање на интернет-сообраќајот, објави во вторникот руското издание на „Форбс“ (Forbes).

Парите ќе бидат искористени за надградба на хардверот што се користи за филтрирање на интернет-сообраќајот, како и за блокирање или забавување одредени ресурси, се наведува во извештајот, кој се повикува на официјални документи.

Русија усвои закон во 2019 година за да овозможи земјата целосно да се отсече од интернетот, во проект што се нарекува кампања за одржување на дигиталниот суверенитет. По целосната инвазија на Украина, Кремљ протера неколку странски социјални медиуми и интернет-компании, иако многу услуги остануваат достапни преку виртуелни приватни мрежи или Ви-пи-ен (VPN).

Надградбите на системот ќе им овозможат на руските власти подобро да го ограничат пристапот до VPN, се наведува во документот.

Нова опрема се купува секоја година од 2020-та, бидејќи обемот на сообраќај расте, соопшти прес-службата на „Роскомнадзор“, според „Форбс“.

Администрацијата на Бајден неодамна им беше домаќин на претставници на неколку големи технолошки компании, вклучувајќи ги „Амазон“ (Amazon.com Inc.), „Гугл“ (Google) и „Мајкрософт“ (Microsoft Corp.), за да разговараат околу алатките за избегнување цензура на интернет финансирани од владите, објави „Ројтерс“ (Reuters) минатата недела.