Необанките го менуваат светот, за македонската регулатива не постојат

Над една милијарда и сто милиони луѓе во светот се корисници на услугите на необанките – целосно дигитализирани банкарски канали. Необанкарството почна да се развива во последните десетина години, а стапката на раст на бројот на клиенти изнесува околу 20 отсто на годишно ниво.

Според последните достапни податоци, заклучно со овој месец бројот на необанки во светот надмина 300. Во оваа бројка се вклучени и необанките за бизниси како и за тие што се специјализирани за тинејџери. Најчести корисници на необанкарството се дигиталните номади, но и младите лица од генерацијата милениумци.

Главна предност е што сметка се отвора за 15 минути, целосно електронски, преку апликација на мобилниот телефон и вообичаено тоа е бесплатно. Отворајќи смета во некоја од необанките, добивате постојана онлајн поддршка и никогаш немате потреба да влезете во филијала. Провизиите при префрлање пари или ги нема или се незначителни. Ниска е провизијата и за подигање пари од кој било банкомат во светот.

До 2025 година овој сектор ќе заработува околу 300 милијарди долари, главно од такси, камати и претплати. Исто така се прогнозира и дека необанките ќе го сменат банкарскиот систем со тоа што ќе го направат полесен и попријателски.

Компаниите повеќе користат финтек услуги од домаќинствата

Во земјава, посебно од пандемијата наваму одењето во филијала стана многу поретко, но според Народна банка на Македонија, во законската регулатива во „нашата земја терминот или концептот на „необанкарство“ или „необанки“ не постои“.

Сепак, пазарот е отворен за финтек – компании кои нудат одредени финансиски услуги исклучиво преку дигитални канали, самостојно или во партнерство со банка, објаснуваат од централната банка за „Блумберг Адрија“.

Анкетата за согледувањата на банките за деловните активности и ризиците од работењето која Народната банка ја спроведе годинава покажува дека дигиталните канали во земјава многу повеќе ги користат компаниите отколку домаќинствата.

Две третини од банките пријавиле дека искористеноста на дигиталните канали во сегментот население се движи до 50 отсто. Исто толку банки оцениле дека нивните клиенти од корпоративниот сектор ги користат дигиталните канали во обем помеѓу 75 и 100 отсто.

Што нудат македонските банки?

Истражувањата на НБРМ покажуваат дека македонските банки континуирано работат на унапредување на своето работење преку воведување на нови технолошки решенија.

Последната анкета покажа дека над 60 отсто од банките во земјава користат биометриска идентификација што е всушност и најзастапена форма од новите финансиски технологии.

„Речиси половина од домашните банки применуваат т.н. услуги на облак, по што следуваат т.н. НФЦ-технологии за дигитални паричници за мобилните плаќања и методите за анализа на големи бази на податоци и алгоритми за потврдување на квалитетот на влезните податоци на моделите“, велат од НБРМ.

Македонските банки главно сами развиваат финтек производи и услуги

Според анкетата, најголем дел од банките во земјава преферираат да креираат сопствени финтек производи и услуги наместо да воспостават соработка со компании.

„Само 23 отсто, односно три од анкетираните банки, пријавиле партнерство на комерцијална основа со постоечка финтек-компанија за развој на нови производи или услуги, а 8 отсто (или по една банка) пријавиле партнерство на некомерцијална основа со финтек-компанија и воспоставување или поддршка на финтек инкубатори/акцелератори. Сепак, речиси половината од банките (шест банки) пријавиле планови за соработка со финтек-компанија во следниот период“, велат од НБРМ.

„Банките коишто во некоја форма соработуваат со финтек-компаниите пријавиле повеќе мотиви за соработката, од коишто најголемиот дел од банките ги истакнуваат привлекувањето нови клиенти и следењето на пазарните трендови, по што следуваат и мотивите поврзани со зголемување на приходите, намалување на идниот конкурентски притисок и други“, велат од НБРМ.

Во моментов нема коментари за веста. Биди прв да коментира...

Остави коментар