.webp){kind=icon}
Финтек-секторот сѐ побрзо се шири во платежната индустрија, која бара нови начини за намалување на трошоците и зголемување на безбедноста на клиентите. Дури 90 проценти од компаниите во земјава се свесни за придобивките што ги носи дигитализацијата за финансиските услуги, а над 70 проценти од нив инвестираат во дигитална трансформација, покажа анкетата спроведена од Народната банка чија цел беше развој на финтек-секторот.
За да ги поттикне и да ги поддржи иновациите во финансиските и платежните услуги, Народната банка во 2019 година ја формира Портата за иновации, чија основна цел е примената на напредни технологии во финансискиот сектор.
Од Народната банка велат дека граѓаните и фирмите најчесто таму бараат совети за различни форми на дигитално плаќање, е-трговија, како и појаснување околу регулацијата за вложување во криптосредствата.
Прочитај повеќе
Македонскиот даночен систем не ги препознава фриленсерите
Во македонското законодавство фриленсерите не се опфатени со Законот за работни односи.
15.05.2024
„Најголем дел од барањата се однесува на идеи и проекти за услуги во платежната сфера, како различни форми на дигитални плаќања и процесирање на картично базирани трансакции. Дополнително, има интерес за појаснување на регулативите за вложување во криптосредства, проекти за е-трговија и платформи за групно финансирање“, велат од Народната банка.
Новата регулатива отвора можности
Тимот на експерти од Портата за иновации им обезбедува на заинтересираните субјекти правно необврзувачки насоки и релевантни информации околу правната усогласеност на иновативните решенија со постојните регулаторни барања, имајќи ги предвид евентуалните потенцијални ризици за финансискиот систем. Досега до Портата за иновации се испратени повеќе од четириесет барања од физички и правни лица, како од земјава така и од странство.
Од Народната банка очекуваат дека новиот закон за платежни услуги ќе ја зголеми заинтересираноста кај стартап-компаниите од финтек-секторот за користење на услугите што ги нуди Портата за иновации.
„Би нагласиле дека со новиот закон за платежни услуги и платни системи, кој беше донесен неодамна заедно со поголем сет од подзаконски акти, се овозможи влез на пазарот на нови субјекти даватели на платежни услуги и се воспостави регулаторна основа за развој на финансиски иновации. Тоа несомнено ќе придонесе за зголемен интерес кај стартап-компаниите од финтек-секторот, но создава можност и за проширување на услугите на странските компании на македонскиот пазар“, велат од Народната банка.
МИА
Од Народната банка посочуваат дека ако се имаат предвид и препораките од усвоената финтек-стратегија за финансиските регулатори, во иднина се очекува динамизирање на соработката со иновативната финтек-заедница.
Британија го има најуспешното тело за поддршка на финтек-иновациите
Слични иницијативи за поддршка на финтек-иновациите се воспоставени и од други централни банки и финансиски регулатори низ светот. Регулаторните сандачиња (англ. Regulatory Sandboxes) се најпознати тела формирани од централните банки во светот.
ФЦА (ФСА), тело формирано во Британија во 2016 година, е едно од најпознатите и најуспешни во светот, кое досега има поддржано 700 иновациски проекти. Преку нивните совети финтек-компаниите стигнуваат побрзо до регулаторно одобрување и пристап до инвеститори. Централната банка во Сингапур го има МАС (MAS), кое досега им помогнало на повеќе од 200 компании да ги тестираат своите производи и услуги, што резултира со зголемен број финтек-стартапи.
Финтек-хабот „ЛТ биг“ во Литванија,, кој е отворен во 2017 година од страна на централната банка, привлече многу финтек-стартапи во земјата, што ја направи Литванија еден од водечките центри за финтек-иновации во Европа. Овој хаб придонесе за подобрување на финансиската иновативност во земјата, вклучувајќи развој на нови технологии за плаќања, финансиски технологии и услуги и поддршка на финтек-стартапи преку образование и тестирање нови технологии.
