Јутјуберите со нов извор на заработка - обучуваат вештачка интелигенција

Јутјубери и други креатори на содржини ги продаваат своите неискористени видео снимки на компании за вештачка интелигенција (ВИ) кои имаат потреба од ексклузивни видеа за подобро да ги обучат своите алгоритми, а честопати заработката изнесува илјадници долари по договор.

„Опен еј-ај“ (OpenAI), „Гугл“ (Google), медиумската компанија „Мунвалеј“ (Moonvalley) и неколку други компании за ВИ колективно плаќаат стотици креатори на содржини за пристап до нивните необјавени видеа, според луѓе запознаени со преговорите. Таа содржина, која не е објавена на друго место на интернет, се смета за вредна за обука на системите за вештачка интелигенција бидејќи е уникатна.

Компаниите за ВИ моментално плаќаат помеѓу 1 и 4 долари за минута снимка, велат изворите, а цената расте во зависност од квалитетот или форматот на видеото. Видеата снимени во 4K, на пример, се продаваат по повисока цена, како и несекојдневните снимки како видеа снимени со дронови или со користење на 3Д анимации. Повеќето снимки, како неискористените видеа создадени за мрежи како Јутјуб, Инстаграм и Тикток, се продаваат за некаде помеѓу 1 и 2 долари по минута.

„Опен еј-ај“, „Мета“ (Meta Platforms Inc). и „Адоби“ (Adobe Inc.) минатата година лансираа генератори на видеа со ВИ, кои можат да создаваат реалистични видеа врз основа на текстуални упатства. За да го направат тоа, сепак, компаниите имаат потреба од огромни количини на податоци за обука, понекогаш и милиони часови на видео содржина.

„Тоа е трка за 'вооружување' и на сите им требаат повеќе снимки“, рече Ден Левит, потпретседател за креатори во „Васерман“ (Wasserman), кој претставува ѕвезди од социјалните мрежи како јутјуберот Метпет (MatPat) и модната инфлуенсерка Тајлен Бигс. „Гледам прозорец во следните неколку години каде лиценцирањето на снимки е профитабилно за креаторите кои се отворени за тоа. Но, не мислам дека тој прозорец ќе трае многу долго“.

Некои креатори на содржини снимаат стотици часови видео снимки секоја година во процесот на создавање видеа за Јутјуб, Инстаграм или Тикток. Но, голем дел од таа содржина никогаш не се објавува онлајн, што значи дека креаторите не заработуваат од неа. Со продавање на таа содржина на компаниите за ВИ, креаторите имаат начин да го диверзифицираат својот приход надвор од рекламните договори со брендови.

„Во 'Mунвалеј', огромното мнозинство од нашите податоци за обука доаѓаат директно од креатори на содржини и филмаџии кои се заинтересирани за лиценцирање на било која видео содржина што ја поседуваат“, напиша компанијата во изјава споделена со „Блумберг“. Портпаролите на „Гугл“ и „Опен еј-ај“ одбија да коментираат.

Компаниите за вештачка интелигенција се соочија со интензивна критика за користење на текстови, видеа и фотографии објавени на интернет без да ги компензираат луѓето кои ја создале таа содржина. Минатата година, новински издавачи, актери и индивидуални креатори на содржини поднесоа тужби против „Опен еј-ај“, „Мета“, „Енвидија“ и други за користење на нивниот интелектуален имот за изградба на ВИ модели и наводно кршење на авторските права. „Сè што јавно објавувате е во основа достапно за користење, и видовме компании кои едноставно го земаат и го внесуваат во нивниот систем“, рече Левит, кој ги охрабрува креаторите да потпишуваат договори за лиценцирање. „Ова е начин да учествувате во тоа, да го направите тоа на многу по легален, структуриран начин, и сега барем имате некоја корист“.

Агенциите за таленти кои претставуваат дигитални креатори работат со трети компании за лиценцирање како „Тровео“ (Troveo AI) и „Калиопе“ (Calliope Networks) за управување со правата за илјадници часови видео снимки што ги поседуваат креаторите. Тие компании преговараат за условите со стотици дигитални креатори на содржини, собираат видео снимки и потоа ја лиценцираат содржината во компании за ВИ. Некои ВИ компании исто така работат директно со креаторите на содржини.

„Со сите компании кои градат видео модели или работиме со нив или се во нашиот процес во моментов“, рече Марти Песис, ко-основач и главен извршен директор на „Тровео“, кој исплатил над 5 милиони долари на креаторите.

Повеќето договори вклучуваат услови кои спречуваат компаниите за ВИ да создаваат дигитални реплики на креаторите на содржини, да имитираат конкретни сцени од нивните канали или да користат снимки на начин што може негативно да влијае на репутацијата на креаторот, вели Ендру Греам, шеф за дигитални корпоративни совети и партнерства за ЦАА (Creative Artists Agency), која има над десет клиенти во преговори за склучување договори со компании за ВИ.

Во моментов нема коментари за веста. Биди прв да коментира...

Остави коментар