„Енвидија“ предупреди дека забраните кон Кина ќе ја чинат 5,5 милијарди долари

Администрацијата на претседателот Доналд Трамп забрани „Енвидија“ (Nvidia Corp.) да го продава својот чип Х20 (H20) во Кина, што претставува ескалација на технолошката битка на Вашингтон со Пекинг, која ќе ја чини компанијата милијарди долари и ќе ја попречи линијата на производи што експлицитно ги дизајнираше за да се усогласи со претходните американски ограничувања.

Американската влада во понеделникот го информира производителот дека за Х20 ќе биде потребна лиценца за извоз во Кина „на неопределено време“. Новите правила ја адресираат загриженоста на Вашингтон дека „производите може да се користат  или да се пренасочат кон суперкомпјутер во Кина“, посочи компанијата во поднесок. „Енвидија“ предупреди дека ќе пријави околу 5,5 милијарди долари во отпис во тековниот квартал, поврзани со резерви и обврски околу чипот.

Нејзините акции паднаа за околу шест отсто во доцното тргување по објавата, предизвикувајќи широка распродажба кај компаниите за полупроводници, од САД до Јапонија. Јужнокорејските производители на чипови „Самсунг“ (Samsung Electronics Co.) и СК (SK Hynix Inc.) паднаа за околу 3 отсто, додека АМД (Advanced Micro Devices Inc.), која се натпреварува со „Енвидија“ на пазарот за чипови за вештачка интелигенција (ВИ), исто така падна.

Новите ограничувања се меѓу најјасните знаци досега дека Трамп ќе се држи до курсот на напорите на Вашингтон да ги ограничи амбициите на Кина за полупроводници и вештачка интелигенција. Неговиот тим разгледува такви потези од стартот на администрацијата, објави „Блумберг њуз“ (Bloomberg News) во јануари, со што продолжија разговорите што започнаа под претседателот Џо Бајден.

Трговскиот секретар на Трамп, Хауард Лутник, вети дека ќе биде „многу цврст“ за ограничувањата на чиповите за Кина - особено по појавата на стартапот за вештачка интелигенција „Дипсик“ (DeepSeek). Тој неодамна санкционира десетици кинески компании за кои официјалните лица на Трамп тврдат дека ги помагаат воените напори на Пекинг. На полето на производство на чипови во азиската земја, акцелераторите за ВИ на „Хуавеј“ (Huawei Technologies Co.) се најблискиот конкурент на понудите на „Енвидија“ и АМД, иако тие сè уште значително заостануваат во однос на перформансите.

„Засилените регулативи на американската влада за 'Енвидија' може да се гледаат како дел од тековната трговска војна меѓу САД и Кина“, рече Томо Киношита, глобален пазарен стратег во ИАМ (Invesco Asset Management). „Сепак, тоа е исто така политика водена од загриженоста за подемот на Кина во секторот за електроника и, во таа смисла, веројатно ќе стане постојана политика“.

Американските официјални лица првпат забранија „Енвидија“ и другите производители на чипови да ѝ ги продаваат своите најнапредни модели на Кина во октомври 2022 година, поради загриженоста дека технологијата може да му даде воена предност на Пекинг. Оттогаш контролите кон Кина се проширија и вклучуваат сè поголем сет на алатки за производство на полупроводници, како и поширок опсег на процесори и чипови со висока пропустливост, кои се од суштинско значење за апликации со ВИ.

„Енвидија“ го дизајнира чипот Х20 како одговор на мерките од 2023 година, кои ограничија друг процесор наменет за кинескиот пазар, Х800 (H800), кој компанијата го претстави по првичните ограничувања. Х20 е помалку моќен и не работи толку добро како врвните продукти на „Енвидија“ за обука на модели. Но, сепак, може да се користи за развој и работа на софтвер и услуги со ВИ и е особено погоден за фазата на инференција: точката во која ВИ-моделите препознаваат обрасци и извлекуваат заклучоци.

Што се однесува до правилата за Х20, отписот на „Енвидија“ сугерира дека компанијата може да пропушти приходи од 14 до 18 милијарди долари во текот на годината, посочуваат во белешка аналитичарите на „Блумберг интелиџенс“ (Bloomberg Intelligence) Кунџан Собхани и Оскар Хернандез Тејада. „Ако ограничувањата продолжат, изложеноста на 'Енвидија' на датацентри во Кина може да се нормализира на ниски до средни едноцифрени проценти, слично на нивото од почетокот на 2024 година“, нагласуваат тие. Тоа беше пред да се зголеми производството на Х20.

Во моментов нема коментари за веста. Биди прв да коментира...

Остави коментар