Македонија се најде на 69. место на листата од 100 земји рангирани во новиот извештај Глобален стартап-екосистем за 2022 година, што е пад за 11 места во однос на претходната година. Од земјите од регионот Адрија, подобри од нас се Хрватска (45. место), Словенија (47. место) и Србија (52. место), а полошо е рангирана само Босна и Херцеговина (95. место).
Извештајот што секоја година го подготвува истражувачкиот центар „СтартапБлинк“ (StartupBlink) врз база на повеќе параметри има цел да им помогне на носителите на политики во јавниот сектор во носење подобри одлуки за развој на стартап-екосистемите, како и да им помогне на менаџерите при одлуките за лоцирање на нивните стартапи.
Во извештајот се рангираат стартап-екосистемите во илјада града во светот. Скопје е единствениот град од земјава што е рангиран, а се најде на 459. место, што е назадување за 179 места во однос на 2021 година.
„Претприемачкиот екосистем во Македонија покажа напредок во последните пет години, главно воден од три сили: претприемачите, ’Стартап Македонија’, и Фондот за иновации, технологија и развој (ФИТР). Мнозинството стартапи имаат можност за финансирање во раната фаза преку државниот ФИТР, но сепак инвеститорите се соочуваат со предизвици во наоѓањето стартапи со висок потенцијал што веќе имаат достигнато фаза на валидација“, се вели во извештајот.
Во него се додава дека ИКТ-секторот во Македонија е активен, со многу талентирани работници, од кои многумина работат од далечина за странски компании.
„Главниот предизвик на земјата е одливот на мозоци. Многу од најталентираните Македонци ја напуштаат земјата во потрага по подобри можности на друго место. За да се избегне тоа, Владата и меѓународните развојни организации треба да направат повеќе за да се распределат повеќе ресурси за локалниот технолошки екосистем и да ги направат ресурсите лесно достапни за локалните претприемачи“, пишува во извештајот.
.webp){kind=icon}
