Македонски стартапи во реално ТВ-шоу ќе се борат за шанса во Силициумската долина

Во Македонија наскоро ќе почне да се прикажува реалното телевизиско шоу „Фаундер гејмс“ (The Founder Games), во кое претприемачи што имаат стартапи ќе се натпреваруваат за шанса својот бизнис да го претстават пред водечки инвеститори и на тој начин да обезбедат капитал за понатамошен развој. За шоуто, кое е прво од ваков вид во Македонија, поразговаравме со Сања Митровска, основачка на платформата  „Нетворкер“ и една од главните носители на овој проект.

Таа вели дека шоуто има цел да го покаже вистинскиот пат на градење еден стартап низ животите на стартапите и нивните ментори.

„Шоуто ќе нуди пристап ’зад завесата’, до реалните совети и негативните критики од судии со искуство во водечки светски компании како ’Интел’ (Intel), ’Епл’ (Apple), ’Шарк Тенк’ (Shark Tank) итн. Целта е да се прикаже вистинското лице на претприемаштвото - од еуфоричните врвови до предизвиците што ги тестираат границите на секој претприемач“, вели Митровска.

Таа објаснува дека преку серија на конструктивен фидбек, менторски сесии и презентации, стартапите ќе се натпреваруваат за шанса да го претстават својот бизнис пред водечки инвеститори и да добијат капитал за раст.

„Ова шоу не само што ги истакнува иновациите и креативноста туку и гради мост помеѓу локалните стартапи и глобалниот пазар, нудејќи им на гледачите уникатна можност да учат преку реални примери“, вели Митровска.  

Како се вршеше изборот на учесниците?

Во „Фаундер гејмс“ ќе учествуваат 19 стартапи од различни индустрии, од технологија и вештачка интелигенција до здравство, образование, физички продукти за кожа од комбуха и транспортирање  сончева светлина, секој со уникатна идеја и визија за иднината.

„Изборот на стартапите се вршеше преку детален процес на селекција, каде што внимателно ги разгледуваме потенцијалот за иновација, валидноста на идејата и способноста на тимот да ја реализира својата визија. Избраните тимови не само што имаат силна идеја туку и покажуваат страст, посветеност и способност да учат и да се адаптираат. Нашата цел е да ги истакнеме најперспективните стартапи што можат да направат вистински импакт во своите области и да придонесат кон иновативниот екосистем на претприемаштвото“, вели Митровска.

За секој од 19-те стартапи има ментор, што им овозможува целосно персонализирано менторство и поддршка.

„Оваа структура е клучна за обезбедување на секој стартап со специфични упатства и совети што најмногу одговараат на нивните потреби и предизвици. Менторите што работат со учесниците се врвни професионалци и успешни претприемачи со богато искуство во различни сектори, вклучувајќи основачи на успешни компании како ’Сивус’ (Seavus) и ’Мбрејн’ (Mbrain), кои се прошириле на меѓународно ниво и работат со глобални клиенти, вклучувај и со НАСА, покажувајќи голем успех во технологијата и иновациите“, посочува Митровска.

 

Таа додава дека на списокот ментори се и водечки фигури во стартап-заедницата, како претседателот на „Стартап Македонија“ (Startup Macedonia), кој успеал да собере значителни инвестиции за стартапите од регионот, со вкупен износ од 200 милиони евра, поттикнувајќи раст и развој на локалната стартап-сцена.

„Исто така, меѓу нив има млади основачи, кои во своите 20-ти години успеале да добијат ’при-сид’ (pre-seed) инвестиции од половина милион евра, демонстрирајќи дека успехот е достапен и за помладите генерации со амбициозни идеи. Во тимот ментори има и експерти во областа на инвестициите, како претседателот на Асоцијацијата на бизнис-ангели, со искуство во менаџирање  проекти со годишен обрт од стотици милиони евра, нудејќи вредни совети и поддршка за финансирање и раст на стартапите“, вели Митровска.  

Таа додава дека како ментори се јавуваат и лидери во технологијата и иновациите што се фокусирани на социјален импакт и успешно развиле апликации со милиони корисници и значајни инвестиции од реномирани инкубатори како „Текстарс“ (Techstars), покажувајќи дека иновативните решенија со позитивно влијание на општеството можат да привлечат глобално внимание и поддршка.

„Во тимот има и исклучителни ментори од научната заедница, како на пример професор што не само што има основано успешни стартапи туку и неговите предавања и наставни методи се основа од која излегле многу од сегашните ментори во програмата“, вели Митровска.

Каде ќе се прикажува шоуто?

Таа објаснува дека проектот „Фаундер гејмс“ е резултат на месеци интензивна подготовка, при што тимот зад шоуто посветил значително време и ресурси, вклучувајќи сè, од селекцијата на учесниците и менторите до развојот на форматот на шоуто и логистичкото планирање.

„Самиот проект ќе трае дополнителни шест месеци, за време на кои учесниците ќе преминат низ различни фази на натпреварување, вклучувајќи менторски сесии, предизвици и презентации пред инвеститори“, вели Митровска.

Шоуто ќе започне со емитување во средината на март и ќе има повеќе продолженија на посебно креиран канал на Јутјуб, како и на мастерклас.мк (masterclass.mk) за дополнителна содржина.

„Ова ќе им овозможи на гледачите од сите краишта на светот да го следат напредокот на стартапите и да учат од нивните искуства, предизвици и успеси на патот кон претприемаштвото“, вели Митровска.

Според неа, оценувањето во шоуто ќе биде внимателно извршено од страна на членовите на Советодавниот борд (Advisory Board), кои ќе ги оценуваат стартапите според нивниот напредок, иновативност и потенцијал за успех.

„За да се обезбеди целосна и балансирана анализа на перформансите на стартапите низ различните фази на натпреварувањето, планираме да вклучиме и гласови од менторите и публиката во следната фаза“, вели Митровска.

Извонредна можност

Таа посочува дека критериумите за оценување ќе се фокусираат на клучни аспекти, како што се иновативноста, изводливоста на бизнис-моделот, потенцијалот за раст, квалитетот на презентацијата и способноста на тимот да се адаптира и да учи.

„Наградата за најдобриот стартап ќе биде патување во Силициумската Долина, каде што ќе имаат можност да се сретнат со потенцијални инвеститори и да ги прошират своите граници, што е извонредна можност за секој претприемач“, вели Митровска.

Инаку, овој проект е поддржан од „Халк банка“, што, како што вели Митровска, значително придонесува кон можноста да се понудат вредни награди и да се обезбеди сè што е потребно за успешно одвивање на сите фази на натпреварувањето.

Во моментов нема коментари за веста. Биди прв да коментира...

Остави коментар