„ЏП Морган“ ќе користи четбот како истражувачки аналитичар

„ЏП Морган“ (JPMorgan Chase & Co.) лансира алатка за генеративна вештачка интелигенција и им порача на вработените да гледаат на неа како истражувачки аналитичар што може да понуди информации, решенија и совети, се наведува во интерен меморандум во кој „Блумберг“ (Bloomberg) имал увид.

Банката им дава на „многу“ вработени во секторот за управување со средства и богатство пристап до сопствена верзија на ЧетГПТ (ChatGPT), наречена ЛЛМ сјут (LLM Suite). Според белешката, алатката може да помогне при пишување, генерирање идеи, решавање проблеми со помош на табеларни пресметки, сумирање документи и друго.

Производот не содржи специфично знаење за делот за управување со средства и богатство и е наменет за продуктивност за општа намена.

Портпаролот на „ЏП Морган“ одби да коментира. Меморандумот претходно беше објавен и од „Фајненшл тајмс“ (Financial Times).

Документот е потпишан од Мери Ердос, раководителка на бизнисот за управување со средства и богатство на банката, Тереза ​​Хејтсенретер, главна директорка за податоци и аналитика на банката, и Мајк Урчијоли, главен директор за информации на единицата за управување со средства и богатство.

Главниот извршен директор на „ЏП Морган“, Џејми Дајмон, поборник за вештачка интелигенција, кој ја споредува нејзината важност со парната машина или интернетот, во април изјави дека технологијата ќе биде вградена во секој од процесите на банката, вклучувајќи тргување, истражување, заштита на капиталот и услуги на клиентите.

Најголемите светски банки експериментираа со вештачката интелигенција во текот на минатата година, поттикнати од нејзиниот потенцијал да ја зголеми продуктивноста на вработените и да ги намали трошоците. „Ситигруп“ (Citigroup) во извештајот од јуни процени дека технологијата би можела да додаде 170 милијарди долари во касата на банкарската индустрија до 2028 година, но дека може да смени повеќе работни места во секторот од кој било друг, при што за 54 отсто ​​од позициите има висок потенцијал да бидат автоматизирани.

„Ситигруп“ соопшти дека ќе ги опреми своите 40.000 програмери со можност да експериментираат со различни технологии за вештачка интелигенција. Заемодавецот исто така користи генеративна вештачка интелигенција за брзо „чешлање“ стотици страници со регулаторни предлози.

„Дојче банк“ (Deutsche Bank AG) користи вештачка интелигенција за скенирање на портфолијата на богати клиенти. И ИНГ (ING Groep NV) врши проверка за потенцијални неплаќачи.

Еден од примарните случаи за употреба на генеративната вештачка интелигенција во финансиската технологија и банкарските гиганти е во службата за клиенти и поддршката.

Во моментов нема коментари за веста. Биди прв да коментира...

Остави коментар