.webp){kind=icon}
Главната нафтена компанија на Абу Даби и Еј-ај-кју (AIQ) се согласија на договор за користење вештачка интелигенција за да ја направат енергетската индустрија поефикасна.
Нафтената компанија на Абу Даби за првпат ќе користи агентска вештачка интелигенција - развиена од Еј-ај-кју во соработка со „Мајкрософт“ (Microsoft Corp.) и Г42 (G42) - за анализа на огромни количества податоци за да се идентификуваат оперативни подобрувања во енергетската индустрија, изјави извршниот директор Султан ал Џабер на отворањето на конференцијата „Адипек“ (Adipec) во понеделникот.
„Тоа ќе ги забрза сеизмичките истражувања од месеци на денови“, рече Ал Џабер, додавајќи дека тоа исто така ќе ја направи индустријата поодржлива со намалување на емисиите. „Ќе се зголеми и точноста на прогнозите за производство до 90 отсто“.
Во септември „Мајкрософт“ и Г42 објавија воспоставување на два центра за вештачка интелигенција во Абу Даби, неколку месеци откако потпишаа договор вреден 1,5 милијарда долари. Г42, компанија што се стреми да стане суперсила за вештачка интелигенција на Блискиот Исток, е дел од империјата вредна 1,5 трилион долари на шеикот Тахнун бин Зајед ал Нахјан, кој е еден од заменик-владетелите на Абу Даби, национален советник за безбедност на Обединетите Арапски Емирати (ОАЕ) и брат на претседателот на ОАЕ.
„Мајкрософт“ е меѓу компаниите што работат на агенти со вештачка интелигенција - системи што извршуваат низа задачи без човечки надзор и постигнуваат работи што постојните модели на вештачка интелигенција не можат да ги постигнат. Некои компании веќе ја користат оваа таканаречена агентска вештачка интелигенција за помош при вработување и управување со синџирите на снабдување.
Ал Џабер исто така рече дека инвестициите во енергетскиот сектор ќе треба да се зголемат на 1,5 трилион долари годишно за да се задоволи зголемената побарувачка од вештачката интелигенција.
