Нова редизајнирана веб-страница на „Блумберг Адрија“

Дали сте меѓу лидерите што се соочуваат со предизвиците што во моментов се поголеми од кога било досега? Во амбиент на сè побрзи промени, сè повеќе информации и трендови што сè потешко се предвидуваат, разликата ја прават токму оние што успешно се трансформираат.

„Блумберг Адрија“ затоа, со најновата трансформација, оди чекор понатаму и ви овозможува да се исправите пред другите.

Ви претставуваме теми што ја движат економијата, ги менуваат односите на моќ и ја обликуваат иднината. Ви го пренесуваме контекстот. Ви ја пренесуваме приказната зад приказната.

А сето тоа од денес е достапно на новата редизајнирана веб-страница, која со интегрирањето на вештачката интелигенција ви носи персонализирана содржина - наменета за вас токму во овој момент. Платформата ја приспособува содржината на вашите интереси и деловни потреби, ви заштедува време и ве држи фокусирани на она што ви е навистина важно за да ја донесете следната деловна одлука, да се истакнете и да напредувате.
„Блумберг Адрија“ не е само извор на информации туку е и ваш водич низ комплексноста на модерниот бизнис. Во продолжение погледнете како изгледа новинарството што работи за вас.

Користејќи ги податоците на терминалот на глобалниот „Блумберг“, македонската редакција анализира и домашни и меѓународни финансиски и економски трендови, и тоа на уникатен начин. Во услови на глобални предизвици, време во кое работи и нашиот медиум, носиме вести многу различни од тие на медиумскиот простор во земјава и навлегуваме во суштината на сите актуелни економски проблеми.

Пазарот на капитал помина низ низа турбуленции. Кризата што започна со нападот на Русија на Украина ги потресе пазарите во стил што не беше очекуван. Но оттогаш досега мечката и бикот ги менуваа улогите. Сега сме во некое ново време, со нови очекувања, оптимистички.

Биковското расположение на берзите почна и трае од почетокот на годинава, а иако македонскиот пазар на капитал е плиток, летоска македонскиот берзански индекс МБИ10 се најде меѓу првите топ пет берзански индекси во регионот ЕМЕА (Европа, Блискиот Исток, Африка) по остварениот принос од почетокот на годината.

А технолошките акции секако се тие што на глобално ниво го предводеа растот. Во чекор анализиравме сѐ што е поврзано со Величествените седум, но и како Македонци заработуваат од овие акции. „Енвидија“ е шампионот, а  и ние имаме инвеститорски шампиони - анализата беше дополнителен бонус. Домашниот берзански индекс го сочинуваат најдобрите компании што се котирани на берзата, од нив повеќето се банки. А тие имаат своја приказна, чиј заеднички именител е профитот. Ексклузивно на нашата прва годишна конференција откривме и дека странци имаат голем интерес за влез во македонскиот банкарски сектор. А кои се сите компании што имаат најголема добивка? И, секако, ве запознавме со блучип-компаниите и од друг агол - кои се најголемите акционери во овие компании. Продолжуваме во детали да ги следиме сите берзански случувања, а знаете дека деновиве берзата ја зоврива „Македонијатурист“. Кој, што и како? Ние ги имаме деталите.

Ексклузивни информации

„Блумберг Адрија“ е на страната на вистината, на фронтот на проверените информации, кои им пркосат на брзите содржини. Сепак, често носиме информации за кои пишуваме први и ексклузивно. Глобалниот минимален данок, кој, како што се виде подоцна, ја погодува и Македонија и за кој е потребна и широка акција, јаглеродното поврзување, новата јаглеродна давачка и можноста и потребата за изградба на нуклеарна централа во земјата се мал дел од низата. Нашата платформа е посветена на известување за зелената агенда и од тој приоритет нема да отстапиме. 

Колку ќе поскапат становите

Македонците традиционално инвестираат во недвижности, а за тоа колку ќе поскапат становите, што ја крева цената и какви се очекувањата на пазарот - ние пишувавме во секој детаљ. Цитиравме релевантни соговорници, обелоденивме зошто има Гифенов парадокс со цените на недвижностите, кој и колку пари троши за недвижен имот, но и кој колкав данок плаќа по овој основ. А колку всушност е преценета вредноста на становите во земјава? И дали се исплати да купувате станови и да ги издавате?

Возилата што најмногу се расипуваат

Возилата „тесла“ се позиционираа високо на автомобилскиот пазар, па откривме кој во земјава прв имаше такво возило. Откривме и кој ги вози најскапите автомобили во земјава, а и какви возила имаат некои од познатите менаџери во државата. Најскапите автомобили во регионот, пак, се возат во Србија. Списокот покажува дека меѓу најскапите лимени миленичиња, минатата година доминираше „ферари“, бидејќи луѓето сè уште сакаат да бидат дел од еден од најексклузивните клубови во светот - сопственици на убавиците од Маранело. Меѓу брендовите во сите пет земји се издвојува „мерцедес-бенц“, иако не влезе во првите десет најбарани. Ние пребаравме и каков автомобил во земјава можете да купите за 20.000 евра. Што мислите? Во последниот период клучен фактор за автопазарот е улогата на Кина. Европа го губи замавот со електричните автомобили, а дури 7 отсто од европскиот БДП е креиран од автомобилската индустрија. Кризата во „Фолксваген“ и во „Форд“ и воопшто германската криза за нас беше исклучителен предизвик за анализа. Како кинеските автомобили се пробиваат на пазарот овде и дали некој од нас има кинеско возило. Што му недостига? 

И кога станува збор за возилата - околу 94 отсто од генерацијата зед (Gen Z) и милениумските инвеститори се заинтересирани да собираат предмети како часовници, ретки автомобили и патики. Секако, анализиравме и кој колкава маржа добива на продадено возило.

 

Вештачка интелигенција

Во ерата на вештачката интелигенција, има ли нешто за што има граници. Нашите анализи одговорија многу прашања. Прво го тестиравме ЧетГПТ за бизнис-идеја, но се осврнавме и на тоа дали ќе знаеме што е вистина кога вештачката интелигенција ќе загосподари со светот. И додека се зборува за чипирање, ние одговоривме што носи идејата за чип во човечкиот мозок. А знаете ли како да останете вечно млад - вечно 18?