.webp){kind=icon}
„Форд“ (Ford Motor Co) ја намалува цената на својот електричен „мустанг мач-Е“ (Mustang Mach-E) во просек за 4.500 долари, по неодамнешните поевтинувања од „Тесла“ (Tesla Inc), засилувајќи ги ценовните војни на забавениот пазар на електрични возила.
Попустот доаѓа за модел што „Форд“ веќе го опиша како непрофитабилен, но производителот на автомобили рече дека се надева дека ќе го надомести дополнителното влошување на маржата преку зголемување на производството за 67 проценти оваа година.
Најниската цена на „мач-Е“ сега започнува од 45.995 долари, што е пад од 900 долари, додека најголемото намалување доаѓа во верзијата „ГТ екстендид ренџ“ (GT Extended Range), која паѓа од 5.900 долари, на 63.995 долари. Овој потег, заедно со намалените стапки на финансирање од 5,3 отсто на „мач-Е“, има цел да се спротивстави на одлуката на „Тесла“ за намалување на цените во целата линија дури за 20 проценти.
Компанијата го усогласува „мач-Е“ и со новите ограничувања на цените на електричните возила за да се квалификува за федерални даночни олеснувања до 7.500 американски долари според Законот за намалување на инфлацијата. Борбата за придобивање на купувачите доаѓа додека аналитичарите предвидуваат дека темпото на раст на електричните возила ќе забави оваа година.
„Нашите конкуренти исто така ги приспособуваат своите цени. Ако сакаме да останеме конкурентни на пазарот, мораме да одговориме“, им рече на новинарите Марин Џаја, главен директор за клиенти на единицата за електрични возила на „Форд“.
Главниот финансиски директор Џон Лолер изјави во јуни дека профитот на „мач-Е“ е избришан од растечките трошоци за стоките. Производителот на автомобили тогаш одговори со зголемување на цените на овој модел за да ги намали загубите.
„Ќе видите притисок врз крајните резултати за нашите електрични возила и тие нема да бидат позитивни“, рече Лолер на автомобилската конференција на „Дојче банк“ (Deutsche Bank).
Bloomberg Mercury
Џаја рече дека „Форд“ работи на подобрување на маржите на „мач-Е“, но не би рекол дали моделот станал профитабилен.
„Ние апсолутно сакаме да заработиме пари. Ние го променуваме возилото за да се обидеме да ги намалиме трошоците“, рече Џаја.
Зголемување на производството
„Деловниот случај на ’мач-Е’ ќе се подобри со зголемување на производството оваа година на 130.000 модели од 78.000 произведени минатата година“, смета Џаја. Фабриката за производство на овој модел во Мексико моментално не е активна, бидејќи производителот на автомобили ја преуредува за да го прошири капацитетот. Џаја најави дека фабриката повторно ќе биде ставена во функција во февруари.
„Гледаме вистински подобрувања во нашата трошковна позиција како резултат на зголемувањето на нашето производство и гледаме одредено олеснување за некои артикли“, рече Џаја.
„Форд“ инвестира 50 милијарди долари за развој и производство на електрични возила и планира да произведува два милиона возила годишно до крајот на 2026 година. Производителот на автомобили со седиште во Мичиген минатата година беше број два продавач на електрични возила во САД, но далеку зад „Тесла“. производителот што контролира речиси две третини од пазарот. Со бруто-автомобилска маржа од 25,9 отсто во четвртиот квартал, „Тесла“ може да ги намали цените, а сепак да генерира здрав профит. На „Форд“ му недостига тој простор за дишење, велат аналитичарите.
„'Тесла' има повисоки маржи од другите, вклучувајќи ги ’Џенерал моторс’ (GM) и ’Форд’, и затоа ги ублажува цените уште повеќе. Повеќето производители на електрични возила моментално губат пари на тие производи, а овие намалувања на цените веројатно уште повеќе ќе го отежнат бизнисот, исто како што се обидуваат да го зголемат производството на понуди за електрични возила“, рече Џон Марфи, аналитичар на „Бенк оф Америка“ (Bank of America).
